Գերմանիայի կանցլեր Անգելա Մերկելն ափսոսանք է հայտնել, որ չի հասկանում Ռուսաստանի դիրքորոշումը Սիրիայի հարցում: Ինչպես հաղորդում է Reuters-ը, այս մասին Մերկելը հայտարարել է Բեռլինում տեղի ունեցած մամուլի ասուլիսում:
Այն փաստը, որ ՄԱԿ-ի ԱԽ-ում որոշ երկրներ (խոսքը Ռուսաստանի և Չինաստանի մասին է) չեն կիսում Եվրոպայի, ԱՄՆ-ի և արաբական աշխարհի մի մասի հայացքները Սիրիայի հարցում, Մերկելն անվանել է «ողբերգական»:
«Ես միշտ դրա վրա եմ հրավիրում Չինաստանի ղեկավարության և Ռուսաստանի նախագահի ուշադրությունը: Սիրիայում հումանիտար վիճակը սարսափելի է: Սակայն, ցավոք, ՄԱԿ-ի Անվտանգության խորհուրդը առայժմ չի կարող ազդել տեղի ունեցող իրադարձությունների վրա»,- նշել է Գերմանիայի կանցլերը:
Հիշեցնենք. Ռուսաստանն ու Չինաստանն արդեն 3 անգամ վետո են դրել ՄԱԿ-ի ԱԽ-ում Սիրիայի հարցով բանաձևի վրա:
