«Ո՞ր օրենքն է պաշտպանված այս երկրում, որ հեղինակային իրավունքները պաշտպանվեն: Ոչ մի օրենք չի աշխատում, կամ որոշակի նախապայմաններով են գործում: Իսկ այն ինչ վերաբերում է մտավոր սեփականությանը, դրան ուշադրություն էլ չեն դարձնում, որովհետև հույս, որ օրենքը կգործի, և դրա շնորհիվ ես կկարողանամ իմ կացությունը կամ իմ երեխաների ապագան ապահովել, ես չեմ փայփայում»,- «Առաջին լրատվական»-ի հետ զրույցում հայտարարեց հեղինակ-կատարող Վահան Արծրունին՝ պատասխանելով հարցին, թե որքանո՞վ է գործում «Հեղինակային իրավունքի մասին» օրենքը և արդյոք երկրում իրադրության բարելավում նկատվո՞ւմ է այդ տեսանկյունից:
Նշելով, որ ռադիոկայաններն իրենց եկամուտից որոշակի ամրագրված մաս են փոխանցում հեղինակային իրավունքները պաշտպանող «Հայհեղինակ» ՀԿ-ին, որը վերաբաշխում է հեղինակների միջև, Վ. Արծրունին փաստեց, որ միաժամանակ անփույթ ռադիոկայանները հեռարձակվող երգացանկի մեջ չեն նշում կատարողներին և շրջանցում են այդ հանգամանքը, իսկ եթերը ոչ ոք չի վերահսկում:
Ձայնասկավառակների վաճառքի առումով Վ. Արծրունին նշեց, որ խնդիրներ չունի, որովհետև աշխատում է միայն բարեխիղճ խանութների հետ, որոնք հարգում են հեղինակային իրավունքները և կոնկրետ իրեն. «Այսինքն՝ ինձ անհայտ մարդկանց հետ ես ընդհանրապես գործ չունեմ»:
«Հայհեղինակ» ՀԿ-ն վերահսկում է ամբողջ դաշտը՝ երգարվեստ, կերպարվեստ, թատրոն, կինո, և բնականաբար, ըստ Վ. Արծրունու, 3-4 աշխատակիցներով հնարավոր չէ ամբողջը ծածկել. «Դրա համար էլ ճարպիկ ռադիոկայանները, հեռուստաընկերությունները շրջանցում են այդ ամենը: Իսկ այսօր «Հայհեղինակը» միակ կառույցն է, որն աշխատում է ի օգուտ հեղինակների, մնացածը հակառակ ուղղությամբ են աշխատում: Այլ բան է, որ ցիվիլ կառույցներ երկրի ներսում չկան, դրանք երկրից դուրս են, որոնց հետ ես կարող եմ հարաբերվել միայն այն դեպքում, երբ ներկայացնում են փաստաթղթեր՝ վավերացված միայն «Հայհեղինակի» կողմից»:
Հեղինակ-կատարողի խոսքով՝ ինքն աշխատում է ներքին շուկայում չաշխատել, դրա համար այդ խնդիրը ցավոտ չի իր համար, իսկ այլ կատարողների՝ ռաբիս, պոպ և այլ ոճերի, դա շատ ավելի ցավոտ խնդիր է, որովհետև հիմնականում «իրենց եփած ճաշն է ճաշակում այս ժողովուրդը, և հետևաբար իրենց գրպանից է պակասում»:
Վ. Արծրունին հիշեցրեց, որ նախկինում դատական պրոցեսներ էին սկսվել հեղինակային իրավունքի խախտման հետ կապված, որոնք ոչ մի արդյունքի չբերեցին: Մասնավորապես, խանութում կեղծ արտադրանքի վաճառք էին հայտնաբերել, բայց դատարանը պատժի չենթարկեց իրավախախտներին: «Արդարադատություն այս պարագայում ակնկալել չի ստացվում: Չի կարող եռացող կաթսայի մեջ մի հատված լինել, որտեղ ջուրը չի եռում»,- նկատեց Վ. Արծրունին:
