Կոտայքի մարզի Եղվարդ քաղաքում սեպտեմբերի 23-ին կայանալիք համայնքի ղեկավարի ընտրություններում «ինտրիգ» չկա. գրանցված է ընդամենը 2 թեկնածու՝ գործող քաղաքապետ, ՀՀԿ-ական Նորայր Սարգսյանը և ինքնաառաջադրված, անկուսակցական Վարդան Մուրադխանյանը: Վերջինս առայժմ Սարգսյանի ենթական է՝ Մուրադխանյանն աշխատում է որպես Եղվարդ համայնքի ղեկավարի աշխատակազմի քարտուղար:
Այս թեկնածուներից ամենահարուստն էլ, բնականաբար, գործող քաղաքապետն է. Սարգսյանն իր բանկային հաշվեհամարներին 2012 թ. սեպտեմբերի 1-ի դրությամբ ունեցել է 15 հզ. ԱՄՆ դոլար և 8 մլն ՀՀ դրամ գումար, իսկ Մուրադխանյանը՝ 2 հզ. ԱՄՆ դոլար և 900 հզ. ՀՀ դրամ:
Ինչպես տեղեկանում ենք «Առաջին լրատվական»-ին Կենտրոնական ընտրական հանձնաժողովի տրամադրած թեկնածուների գույքի և եկամուտների հայտարարագրերից, համայնքի ղեկավարի պաշտոնին հավակնող 2 թեկնածուների եկամուտներն անցած 1 տարում գոյացել է աշխատավարձերից՝ ՀՀԿ-ական Նորայր Սարգսյանինը՝ 3 մլն 50 հզ. դրամ, իսկ Մուրադխանյանինը՝1 մլն 564 հզ. դրամ: Երկուսն էլ որևէ արժեթուղթ կամ ներդրում, նաև 8 մլն դրամը գերազանցող գույք չեն հայտարարագրել: Սարգսյանն ունի 1982 թ. արտադրության 1 տրակտոր, Մուրադխանյանի հայտարարագրից շարժական գույքի մասին տվյալները բացակայում են:
Երկու թեկնածուների մոտ էլ «հարուստ» է անշարժ գույքի բաժինը: Այսպես, Սարգսյանը հայտարարագրել է Եղվարդում 1 բնակելի տուն՝ 335 քմ մակերեսով, կից ավտոտնակով (74.6 քմ), հողամասով (0.1 հա), բնակելի կառուցապատման հողամաս (0.087 հա), թոնրատուն (26 քմ), գոմեր (54 քմ և 646 քմ), վարելահողեր (0.465 հա և 0.48 հա), գյուղարտադրական օբյեկտ (1.25 հա), պահակատուն (52 քմ), բոքսեր (168 քմ), ծածկոց (224 քմ), ավտոկշեռք (45 քմ):
Մուրադխանյանը որպես անշարժ գույք հայտարարագրել է 2 բնակելի տուն (168.4 քմ և 152.5 քմ մակերսով), բնակելի կառուցապատման հողամասեր (0.1 հա և 0.12), կաթսայատուն (13 քմ), մառաններ (60.3 քմ, 26 քմ և 39.7 քմ), գոմեր (30.8 քմ, 33.1 քմ և 41.6 քմ), ավտոտնակ (31.5 քմ), հավանոց (7.5 քմ), ցախանոց և վարելահող (1 հա):
