Սեպտեմբերի 6-ին Միացյալ Նահանգների Նյու Յորքի հարավային շրջանի Դատական ակտերի կատարման ծառայությունը կատարման է տրամադրել Կատարողական թերթ՝ Վարդան Այվազյանի հանդեպ կատարման համար հօգուտ «Գլոբալ Գոլդ Մայնինգ» ՍՊԸ-ի (ԳԳՄ)։ Ըստ այդմ, Hetq.am-ի փոխանցմամբ, Վարդան Այվազյանից պետք է գանձվի երեսունյոթ միլիոն հինգ հարյուր երեսունյոթ հազար ինը հարյուր յոթանասունութ ԱՄՆ դոլար և երկու ցենտ ($37,537,978.02):
«Առաջին լրատվական»-ին հաջողվեց կապ հաստատել ԱՄՆ, Նյու Յորք և զրուցել «Գլոբալ Գոլդ Մայնինգ» ՍՊԸ տնօրեն Վան Գրիգորյանի հետ: Նա՝ որպես կողմ, հետևելով օրենքին, չցանկացավ հրապարակված դատավճռին որևէ բան ավելացնել: Հարցին՝ հնարավո՞ր է գործը փոխանցվի Պետքարտուղարություն, նա չբացառեց՝ նշելով, որ այդպիսի որոշում կարող են կայացնել իր փաստաբանները:
Հիշեցնենք, որ Hetq.am-ը օրեր առաջ տեղեկացրել էր, որ «Գլոբալ Գոլդ Մայնինգ» ընկերության դուստր ընկերություններից մեկը ենթարկվել էր կոռուպցիոն դրսևորումների Հայաստանի բնապահպանության նախկին նախարար Վարդան Այվազյանի կողմից։ Ընկերությունը տեղեկացրել էր այդ իրավիճակի մասին Հայաստանի և Միացյալ Նահանգների համապատասխան մարմիններին: Արդյունքում ընկերությունը Այվազյանի պատճառով կորցրել էր Հանքավանի հանքավայրի նկատմամբ հսկողությունը։
