Սերբիան պետք է հմուտ քաղաքականություն վարի Եվրամիության անդամ դառնալու համար, սակայն պարտադրված չէ հաստատել Կոսովոյի անկախությունը: Նման հայտարարությամբ է հանդես եկել Սերբիայի վարչապետ Իվիցա Դաչիչը` մեկնաբանելով Գերմանիայի իշխող «Քրիստոնեա-դեմոկրատական միություն» կուսակցության համապատասխան պահանջը: Այս մասին հաղորդում է Rosbalt.ru-ն:
«Յուրաքանչյուրն ունի իրավունք` հայտնելու իր կարծիքը, որը կարելի է լսել կամ չլսել: Մենք մտադիր ենք ինտեգրվել Եվրամիությանը, սակայն պարտավորված չենք հաստատել Կոսովոյի անկախությունը: Դա մեր սկզբունքային որոշումն է, այն այդպիսին կմնա մինչև վերջ»,- ասել է Դաչիչը:
Նա նշել է, որ Սերբիան պատրաստ է երկխոսության` «ցանկացած ձևաչափով և ցանկացած վայրում, և եթե հարկ է` պատրաստ է անցկացնել բանակցությունների 100 ռաունդ (դրանք հենց այդքան էլ կանցկացվեն), սակայն չի հրաժարվի իր սկզբունքից»:
Վերջերս Բելգրադ կատարած այցի ընթացքում Գերմանիայի իշխող կուսակցության ներկայացուցիչ Անդրեաս Շոկենհոֆը հայտարարել էր, որ Եվրամիությանն ինտեգրվելու համար Սերբիան պետք է Պրիշտինայի հետ երկկողմ հարաբերությունների կարգավորման վերաբերյալ իրավական փաստաթուղթ ստորագրի:
