201-րդ ռուսական ռազմաբազան դեռ ևս 20-30 տարի էլ կմնա Տաջիկստանի տարածքում: Այս մասին հաղորդել են Դուշանբեում ընթացող բանակցություններին մոտ աղբյուրները: Բանակցություններն ավարտին են մոտենում:
Ռուսական ռազմաբազայի ճակատագրի վերաբերյալ բանակցությունների վերջին փուլը կայացավ սեպտեմբերի 12-13-ը: Դրանք անցկացվում էին փակ ռեժիմով:
«Պայմանավորվածության նախնական տարբերակը ստորագրվել է 29 տարով, սակայն այն կարող է երկարաձգվել ևս 10 տարի, եթե բանակցությունների վերջին փուլում կողմերը բարձրացնեն այս հարցը»,- Интерфакс-ին հայտնել է տեղեկացված աղբյուրը:
Համաձայնագիրը ֆինանսական կողմ չի նախատեսում:
«Ռազմաբազայի ժամկետի երկարաձգման դիմաց Տաջիկստանը կստանա զեղչեր ռուսական զենք գնելիս, և նրա սպաները Ռուսաստանի ռազմական բուհերում սովորելու հնարավորություն կունենան»,- Reuters-ի փոխանցմամբ` ասել է Տաջիկստանի կառավարության աղբյուրը:
Հավանաբար, պայմանագրի վերջնական տարբերակը կստորագրվի երկու երկրների նախագահների հանդիպումից հետո: Աղբյուրների տվյալներով` համաձայնագիրը կստորագրվի հոկտեմբերին:
Տաջիկստանում 201-րդ ռուսական ռազմաբազան ամենամեծն է և ամենահզոր ռազմական կառույցներից է Կենտրոնական Ասիայում: