Իսրայելի փոխվարչապետ Դան Մերիդորը հանդես է եկել Բենյամին Նեթանյահուի կառավարության մտադրության դեմ՝ առանց ԱՄՆ-ի համաձայնության հարված հասցնել Իրանի միջուկային օբյեկտներին: Իսրայելական ռադիոյին տված հարցազրույցում Մերիդորը, որը համակարգում է միջուկային հարցերը և հետախուզության գործողությունները, հայտարարել է, որ դեմ է որևէ «կարմիր գծի» նշանակմանը (Իրանի համար որոշակի կոշտ սահմանի հաստատում, որը խախտելու դեպքում Իսրայելը պետք է հարձակվի Իրանի վրա):
Մերիդորի հայտարարությունը նշանակում է Իսրայելի «ներքին կաբինետում» տարաձայնությունների ուժեղացում: Փոխվարչապետի կարծիքով՝ այժմ պետք է խոսել ոչ թե «կարմիր գծերի» և ռազմական լուծման, այլ իրանական միջուկային խնդրի լուծման այլ միջոցների մասին: «Անհրաժեշտ է գտնել ցանկացած այլ ուղի այնքան ժամանակ, քանի դեռ այդ հնարավորությունները չեն սպառվի»,- ընդգծել է Մերիդորը:
«Ռազմական հարվածից խուսափելու միակ ճանապարհը միջազգային մակարդակում միջուկային սպառազինության մրցավազքի դադարեցման մասին համաձայնագրի հասնելն է»,- ասել է նա:
Իսրայելի ղեկավարության մեջ տարաձայնություններն ակնհայտ դարձան Օբամային հայտարարությունից հետո, որում նա հանդես եկավ Թեհրանի հետ բանակցությունները շարունակելու օգտին և գործնականում դեմ արտահայտվեց Իրանին որևէ վերջնագիր ներկայացնելուն: Այսպես, հրեական պետության արտգործնախարարը և պաշտպանության նախարարը զգուշացրին վարչապետին, որ իրենք չեն ցանկանում իրանական հարցի շուրջ սրել հարաբերությունները ԱՄՆ-ի հետ:
