Այսօր Ստրասբուրգում Եվրախորհրդարանը ընդունել է «Ռուսաստանում արդարադատությունը քաղաքական նպատակներով օգտագործման մասին» բանաձևը: Այս մասին հայտնում է RIA Novosti-ն:
Փաստաթուղթը ԵՄ դիվանագիտության ղեկավար Քեթրին Էշթոնին ու Եվրահանձնաժողովին կոչ է անում Ռուսաստանում քաղաքացիական հասարակության ակտիվիստներին և «նոր սոցիալական շարժման» ներկայացուցիչներին ապահովել «մշտական ու խորը» օգնությամբ, ինչպես նաև ռուսական իշխանությունների վրա մշտապես ճնշում գործադրել՝ նպատակ ունենալով նրանց ստիպել հետևելու մարդու իրավունքների, ժողովրդավարության, օրենքի գերակայության, դատական համակարգի անկախության ԵԱՀԿ չափանիշներին: Ըստ խորհրդարանականների` այս ամենից է կախված ՌԴ-Եվրամիություն հարաբերությունների «իրական ու կառուցողական» բնույթը:
Բանաձևը ողջունում է ՌԴ Գերագույն դատարանի որոշումը՝ կապված Միխայիլ Խոդորկովսկու և Անտոն Լեբեդևի գործերի վերանայման հետ, նաև վերջինի համար սահմանված պատժաչափի կրճատումը. կոչ է արվում ամբողջությամբ վերանայել գործերը:
Եվրախորհրդարանականները ռուսական իշխանություններին կոչ են արել պատասխանատվության ենթարկել լրագրող Աննա Պոլիտկովսկայային և իրավապաշտպան Նատալյա Էստեմիրովային սպանողներին, անցկացնել «անկախ ու վստահության արժանի» քննություն՝ պարզելու Սերգեյ Մագնիտսկու մահվան պատճառը, ու «վերջ տալ լայն տարածում գտած անպատժելիությանն ու կոռուպցիային»:
Եվրախորհրդարանի բանաձևում խորը անհանգստություն է հայտնվում ռուս գիտնականների դատական հետապնդումների, ինչպես նաև ընդդիմադիր, ԳՈՒԼԱԳ-ում 8 տարվա ազատազրկման դատապարտված Թաիսիա Օսիպովայի գործում «քաղաքական դրդապատճառների» առկայության ու ընդդիմության ակցիաների մասնակիցների, մասնավորապես Ալեքսեյ Նավալնիի, Բորիս Նեմցովի ու Սերգեյ Ուդալցովի նկատմամբ քրեական հետապնդման առնչությամբ:
Բացի այդ՝ եվրախորհրդարանականները «անհամաչափ» են անվանել ռուսական Pussy Riot պանկ-խմբի մասնակիցների հանդեպ դատավճիռը՝ նկատելով, որ նրանց նկատմամբ դատական պրոցեսը ևս մեկ վկայություն է «Ռուսաստանի Դաշնությունում վախի ու քաղաքական հետապնդումների կտրուկ աճի»:
Բանաձևում նշվում է նաև, որ պատգամավոր Գենադի Գուդկովին պատգամավորության մանդատից զրկելու մասին հարցի քննարկումը Եվրոպայում ընկալվում է որպես «ընդդիմության ներկայացուցիչների նկատմամբ վախ սերմանելու միջոց»:
Բացի այդ՝ եվրախորհրդարանականները գտնում են, որ «Ռուսաստանում վերջին շրջանում մարդու իրավունքների ոլորտում իրավիճակը կտրուկ վատթարացել է», և որ ռուսական իշխանությունները «մի շարք երկիմաստ օրենքներ են ընդունել, որոնք կարող են կիրառվել հետագայում ընդդիմության և քաղաքացիական հասարակության գործողությունները, ինչպես նաև խոսքի ու հավաքների ազատությունը սահմանափակելու նպատակով»:
