Lenta.ru-ի փոխանցմամբ՝ Թեհրանի նվազագույնը 500 բնակիչներ բողոքի են դուրս եկել՝ ընդդեմ ԱՄՆ-ում «Մուսուլմանների անմեղությունը» հակաիսլամական ֆիլմի նկարահանման: Քանի որ արդեն ավելի քան 30 տարի է, ինչ Իրանի ու ԱՄՆ-ի միջև գոյություն չունեն դիվանագիտական հարաբերություններ, ցուցարարները ստիպված են եղել իրենց ակցիան իրականացնել Շվեյցարիայի դեսպանատան մոտ, որն Իրանում ներկայացնում է նաև ԱՄՆ-ի շահերը:
Ցուցարարները «զինված են եղել» այդպիսի ակցիաներին բնորոշ` «Մահ ԱՄՆ-ին» և «Մահ Իսրայելին» պաստառներով: Նրանք հնչեցրել են համանման հայտարարություններ և կոչ են արել հաշվեհարդար տեսնել ֆիլմը ստեղծողների հետ: Շվեյցարիայի դեսպանատան անվտանգության ուժեղացման համար այնտեղ են ուղարկվել ոստիկանական ջոկատներ:
Հիշեցնենք, որ այդ ֆիլմի պատճառով հարձակման են ենթարկվել Լիբիայում, Եգիպտոսում և Եմենում ԱՄՆ-ի դիվանագիտական ներկայացուցչությունները, իսկ Բեռլինում ամերիկյան դեսպանատունը ստիպված են եղել դատարկել՝ ահաբեկչական վտանգի պատճառով:
