«Մուսուլմանների անմեղությունը» ֆիլմի ռեժիսորի անձը, որը արաբական մի շարք երկրներում հանգեցրեց անկարգությունների և Լիբիայում ԱՄՆ դեսպանի մահվան, մտացածին կերպար է: Նման եզրակացության են եկել Associated Press-ի լրագրողները: Ֆիլմի մասին տեղեկության մեջ նշվում է, որ հեղինակի անունը Սեմ Բեյսիլ է:
Սեպտեմբերի 12-ին AP-ի լրագրողները հարցազրույց են վերցրել 55-ամյա Բեսլի Նակուլայից: Վերջինս հայտարարել է, որ օգնել է ֆիլմի նկարահանումների աշխատանքներին: Նա նշել է, որ ինքը քրիստոնյա ղպտի է, և ֆիլմը ստեղծվել է ի պաշտպանություն քրիստոնյա ղպտի հանրության, որին, նրա խոսքերով, սպառնում է իսլամը:
Նակուլան հերքել է այն ենթադրությունը, որ ինքը հենց ռեժիսորն է, և ասել է, որ անձամբ ճանաչում է Սեմին: Իր խոսքերը հաստատելու համար տղամարդը լրագրողներին ցույց է տվել իր վարորդական իրավունքը: Սակայն գործակալության լրագրողը նշում է, որ նա մատով փակել է իր երկրորդ անունը՝ Բեսլի:
Նակուլան 2010թ. Կալիֆոռնիայում դատապարտվել է 21 ամսվա ազատազրկման և մոտ 800 հազար դոլար տուգանքի` դաշնային բանկից կատարած խարդախությունների համար: Նա 5 տարի համակարգչից և համացանցից օգտվելու իրավունք չի ունեցել` առանց իր սպայի թույլտվության: Սեփական անունից բացի՝ ըստ դատական փաստաթղթերի, Նակուլան օգտագործել է Նիկոլա Բեյսիլի, Էռվին Սալամեհ և այլ կեղծանուններ:
AP-ին հաջողվել է գտնել Սեմ Բեյսիլի բջջային հեռախոսի համարը. այն լրագրողներին տվել է պահպանողական ղպտի Մորիս Սադեկը, որն ապրում է ԱՄՆ-ում և զբաղվում ֆիլմի տարածմամբ: Այդ հեռախոսահամարի հետքը տարել է Լոս Անջելեսին մերձակա նույն հասցեն, որտեղ գործակալության լրագրողները հանդիպել էին Նակուլայի հետ:
Սեպտեմբերի 11-ին լրագրողներին հաջողվել էր կապվել այն մարդու հետ, ով իրեն անվանում է Սեմ Բեյսիլ: Վերջինս ներկայացել էր որպես իսրայելցի 56-ամյա գրող և ռեժիսոր, որը Կալիֆոռնիայում զբաղվում է անշարժ գույքի վաճառքով: Իսրայելը, սակայն, հերքել է, որ ինքը Սեմ Բեյսիլ անուն-ազգանվամբ քաղաքացի ունի, բացի այդ` YouTube-ում Սեմ Բեյսիլի էջում նշված է, որ նա 74 տարեկան է: Ավելին` Կալիֆոռնիա նահանգում տրված արտոնագրերում (այդ թվում` անշարժ գույքի դեպարտամենտում) նման անվամբ մարդ չկա:
Այն, որ Սեմ Բեյսիլը ռեժիսորի իրական անունը չէ, հաստատել է նաև պահպանողական պաստոր Թերի Ջոնսը, որը հայտնի է 2010թ. սեպտեմբերի 11-ին Ղուրանն այրելու իր գործողությամբ: Հաղորդվում է, որ Ջոնսը հեռախոսազրույց է ունեցել ռեժիսորի հետ: «Նա ակնհայտորեն թաքնվում է և չի բացահայտում իր անձը»,- ասել է պաստորը:
Ֆիլմում հանդես եկող դերասանները հայտարարել են, որ իրենց մոլորեցրել են, և իրենք չեն իմացել ֆիլմի հակաիսլամական բնույթի մասին: Մի շարք արտահայտություններ աղավաղվել են հնչյունավորման ժամանակ: Այսպես. երբ խոսքը վերաբերում է Մուհամմադ մարգարեին, կադրում կամ դերասաններ չկան, կամ նրանց շրթունքներն այլ բան են արտաբերում:
«Մուսուլմանների անմեղությունը» ֆիլմը ներկայացնում է Մուհամմադ մարգարեի և իսլամի մասին այլընտրանքային պատմություն: Այն լայն վարձույթի չի հանվել: Սակայն արաբական մի շարք երկրներում այն դիտել են արմատական իսլամիստները, ինչը հանգեցրել է Եգիպտոսում, Լիբիայում, Թունիսում ԱՄՆ դիվանագիտական ներկայացուցչությունների վրա հարձակումների և Լիբիայում ԱՄՆ դեսպանի սպանության: