Apple ընկերությունը պատրաստ է iPhone 5-ի ներկայացմանը, որի պաշտոնական արարողությունից մեկուկես շաբաթ անց այն արդեն կհայտնվի վաճառքում, չնայած այսօր իսկ ընկերությունը լիովին պատրաստ է մոդելը ներկայացնելուն: Վերլուծաբանների կարծիքով՝ նոր մոդելը կարժենա 600 դոլար: Ենթադրվում է, որ ընթացիկ տարվա վերջին եռամսյակում Apple-ը իր նոր մոդելի վաճառքից ստանալու է 5 մլրդ դոլարի եկամուտ:
Տեղեկատվության արտահոսքի շնորհիվ մինչ պաշտոնապես ներկայացնելը հնարավոր եղավ պարզել նոր մոդելի արտաքին տվյալները: Այն ունենալու է ավելի մեծ էկրան, քան iPhone 4S-ը, բացի այդ՝ ունենալու է էներգախնայող դիսփլեյ, ինչի շնորհիվ մարտկոցներն ավելի երկարաժամկետ կաշխատեն: Հաստությունը ևս մի քանի մմ-ով ավելացված է, իսկ կաղապարն ավելի ձգված է, հետևի վահանակն էլ մետաղական է:
Վերլուծաբանները կանխատեսում են, որ մինչև այս տարեվերջ կվաճառվի 8 մլն նոր սմարթֆոն: «Թվում է՝ այս կանխատեսումները շատ լավատեսական են, բայց հիշենք, թե ինչ ցնցում առաջացրեց նախորդ մոդելի վաճառքը`գերազանցելով բոլոր ակնկալիքները: Իսկ iPhone-ի հինգերորդ սերունդը ավելի սպասված է, քան իր նախորդը»,- նշել է վերլուծաբան Մայքլ Ֆերոլին: