Սիրիայի առևտրաարդյունաբերական կենտրոն Հալեպում իրավիճակը ժամ առ ժամ է լարվում: Այսօր Սիրիայի ազատբանակայինների և իշխանական զորքերի միջև կատաղի մարտեր են ծավալվել Հալեպի միջազգային օդանավակայանի մոտ:
Այս մասին «Առաջին լրատվական»-ին Հալեպից հայտնեց հալեպահայ Րաֆֆի Մերջանյանը: Նա նշեց, որ, ամենայն հավանականությամբ, մարտերը մեկնարկել են երեկ երեկոյան, ինչի արդյունքում էլ մեր հայրենակիցները օդանավակայանից Հալեպ ճանապարհին ընկել էին կրակահերթի տակ:
Նրա խոսքով՝ իրեն հայտնի չէ, թե ինչու են մարտերը օդանավակայանի մոտ ծավալվում: «Երեկ երեկոյան 7 հայ են սպանել, բոլոր հիվանդանոցներում մեր հայրենակիցներն են, նրանք էլ վիրավորվել են: Շատ վատ է վիճակը, չգիտենք` ինչ է կատարվում, հայերի համար շատ վտանգավոր վիճակ է Հալեպում»,- ասաց Րաֆֆի Մերջանյանը:
Նա տեղեկացրեց, որ լարված է իրավիճակը նաև հայաշատ Նոր Գյուղ թաղամասում: Հալեպահայի խոսքով՝ այժմ իշխանական օդուժը կրակահերթի տակ է պահում Նոր Գյուղը, որտեղ հաստատվել են ապստամբները:
Եզրափակելով իր խոսքը՝ նա ասաց, որ յուրաքանչյուր րոպեն իրենց համար կարող է ճակատագրական լինել, ուստի միայն աղոթում են՝ հուսալով, որ լավ կլինի:
Լուրը հաստատել է նաև ռուսական Itar-Tass լրատվական գործակալությունը:
Հիշեցնենք. երեկ երեկոյան Սիրիայի ազգային ավիափոխադրող ընկերության օդանավով Հալեպ ժամանած հայերը Հալեպի օդանավակայանից երկրորդական ճանապարհով Հալեպ ուղևորվելիս կրակի տակ էին հայտնվել: Ներկայացրել էինք նաև կրակահերթի զոհ դարձած հայերի անունները՝ Հարութ Սուլավյան, Արսեն Փեփեջյան, Հրաչ Փեփեջյան և Մեսրոպ Աճեմյան:
