Հիշում եք` որոշ ժամանակ առաջ Հայաստանում շատ տարածված մի անեկդոտ կար:
Մի մարդ զենքը ձեռքին նստում է տաքսի, ասում է վարորդին.
– Քշի՛ր Թուրքիա, ես դրանց հերն եմ անիծել:
– Բայց ի՞նչ է պատահել,- զարմացած հարցնում է վարորդը:
– Փաստորեն դրանք Արարատը վերցրել են,- պատասխանում է ուղևորը:
– Բայց դա շատ վաղուց է եղել,- ասում է վարորդը:
– Ես նոր եմ իմացել, քշի՛ր,- բացականչում է ուղևորը:
Երեկ Ռուսաստանը վերջապես արձագանքեց արդեն մի քանի շաբաթ Լիբիայում տեղի ունեցող արյունահեղությանը, մինչդեռ ողջ քաղաքակիրթ աշխարհը դա վաղուց արել է: Նախագահ Դմիտրի Մեդվեդևը հենց նոր իմացավ, որ «Մասիսն այլևս մերը չի», և խստորեն դատապարտեց Քադաֆիի իշխանության գործողությունները, որոնք ուժային մեթոդներով ճնշում են ընդդիմադիր զանգվածի բողոքի ակցիաները:
Հատուկ հայտարարության մեջ Մեդվեդևը խորը մտահոգություն է հայտնել հյուսիսաֆրիկյան այդ երկրում տեղի ունեցող իրադարձությունների կապակցությամբ: Նա նաև ափսոսանք է հայտնել խաղաղ բնակչության շրջանում բազմաթիվ զոհերի կապակցությամբ: Ըստ Մեդվեդևի` Լիբիայի իշխանությունները պետք է բանակցություններ սկսեն ընդդիմության հետ: «Այլ դեպքում այսօրինակ գործողությունները կորակվեն որպես հանցագործություն` այստեղից բխող բոլոր հետևանքներով», ասված է ՌԴ նախագահի հայտարարության մեջ:
