Ժամանակակից ցար, որը հետաքրքրված է միայն սեփական հարստացմամբ: Այսպես է The Times-ի հետ հարցազրույցում ՌԴ նախագահ Վլադիմիր Պուտինին անվանել Ալեքսեյ Նավալնին:
«Պուտինը նախագահական երրորդ ժամկետը սկսել է ներքին բռնաճնշումների քաղաքականությամբ, սակայն միևնույն ժամանակ, փոխզիջումներ է որոնում Արևմուտքի հետ նրա համար, որ նա ու նրա իշխող կլանը նախկինի պես կարողանան վայելել իրենց հարստությունը արտասահմանում»,- լրագրող Թոմի Հելփինը մեջբերում է ընդդիմադիրի խոսքերը:
Նավալնին «մեկ տարուց էլ պակաս ժամանակահատվածում դարձել է լուրջ սպառնալիք Պուտինի համար՝ սկսած 2000 թվականից»,- կարծում է Հելփինը:
«Շաբաթ օրը կվերսկսվեն բողոքի փողոցային ակցիաները: Ընդդիմության համար դա կլինի ռեժիմի վրա ճնշման շարունակման կարողության քննություն»,- ասվում է հոդվածում:
Նավալնին խոստովանում է, որ դեմոկրատիայի համար պայքարը կարող է երկար տևել, քանի որ Պուտինն ու նրա շրջապատը «հեշտությամբ չեն հրաժարվի իրենց համար իշխանության մեջ անենակարևոր բանից՝ անվերահսկելի կերպով հարստանալու հնարավորությունից և ցարերի ու 19-րդ դարի կայսրերի վերածվելուց»:
Սակայն հանրահավաքները իրենք իրենց չեն դադարի, ընդգծել է Նավալնին: «Միլիոնավոր մարդիկ գիտեն միայն մի պարզ ճշմարտություն. իշխանությունը ոչ լեգիտիմ է, ինչպես նաև ընտրությունների արդյունքներեն են կեղծվել»,- ասել է նա:
Ընդդիմադիրի խոսքով՝ շաբաթ օրը Մոսկվայում կհավաքվեն տասնյակ հազարավոր մարդիկ, անգամ եթե քաղաքապետարանը ակցիա անցկացնելու թույլտվությույն չտրամադրի:
Վերջերս Նավալնին գործարար Ալեքսանդր Լեբեդևի աջակցությամբ ընտրվել էր «Աերոֆլոտի» տնօրենների խորհրդի անդամ:
Որոշ ակտիվիստներ Լեբեդևին կասկածով են վերաբերվում, քանի որ նա ծառայել է ԿԳԲ-ում: Նավալնին, սակայն, հարցազրույցում նկատել է, որ Լեբեդևը ֆինանսավորում է ընդդիմության շատ նախագծեր, իսկ ռուսական իշխանությունները «ոչնչացնում են նրա բիզնեսն ու փորձում են բանտ նստեցնել Լեբեդևին»:
Նավալնին խոստովանել է, որ ինքը նույնպես ապրում է կալանավորվելու մշտական վտանգի պայմաններում: «Սակայն Պուտինի ռեժիմն ի վիճակի չէ բռնաճնշումների միջոցով ճնշել բողոքի շարժումը, քանի որ ոչ արդյունավետ քաղաքական ռեժիմը ոչ արդյունավետ է ամեն ինչում»,- հայտարարել է Նավալնին:
