Մոհամեդ Ալ-Զավահիրին` «Ալ-Քաիդա» ահաբեկչական ցանցի առաջնորդ Այման Ալ-Զավահիրիի եղբայրը, CNN հեռուստաալիքի հետ հարցազրույցում հայտարարել է իր պատրաստակամության մասին` հանդես գալու իսլամիստների և Արևմուտքի միջև խաղաղության համաձայնագրի կնքման միջնորդ:
Փաստաթղթի նախագիծը կազմված է 6 էջից: Արևմուտքին, այդ թվում` ԱՄՆ-ին, առաջարկվում է չներխուժել մուսուլմանական տարածք, չմիջամտել իսլամական կրթությանը, դադարեցնել պատերազմը իսլամի դեմ և ազատ արձակել բոլոր մուսուլման բանտարկյալներին:
Համաձայն փաստաթղթի` իսլամիստները պետք է դադարեցնեն հարձակումներն Արևմուտքի դեմ, պաշտպանեն մուսուլմանական հողերում Արևմուտքի օրինական շահերը, հրաժարվեն Արևմուտքի հանդեպ սադրանքներից:
Մոհամեդ Ալ-Զավահիրին 14 տարի անցկացրել է եգիպտական բանտում` նախագահ Անվար Սադատի սպանությանը մասնակցություն ունենալու մեղադրանքով: Նա հերքում է մեղադրանքները: Եգիպտոսի նոր կառավարության աղբյուրը հաստատում է, որ Ալ-Քաիդայի առաջնորդի եղբայրը վայելում է ոչ միայն նախարարների նոր կաբինետի վստահությունը, այլև իսլամիստների հարգանքը: CNN-ի զրուցակիցը հավաստում է, որ Մոհամեդ Ալ-Զավահիրին մասնակցում է նաև եգիպտացի զինվորականների հետ ընդհարվող Սինայի գրոհայինների հետ բանակցություններին: Այման Ալ-Զավահիրին գլխավորում է «Ալ-Քաիդան» անցած տարի Ուսամա բեն Լադենի սպանությունից հետո:
