Թուրքական Haber Türk թերթին տված հարցազրույցում Թուրքիայի էներգետիկայի ու բնական պաշարների նախարար Թաներ Յըլդըզն անդրադարձել է սուլթան Աբդուլ Համիդ 2-րդի կառավարման ժամանակ մշակված նավթային քարտեզին: 106 տարի առաջ կազմված այդ քարտեզում նշված է, որ Օսմանյան կայսրության 65 վայրերում հայտնաբերվել է նավթ:
Այդ վայրերի թվում նշված են նաև Բաղդադն ու Մոսուլը, որոնք այն ժամանակ մտնում էին Օսմանյան կայսրության կազմում: Անդրադառնալով քարտեզին՝ Թաներ Յըլդըզը հայտարարել է. «Այդ քարտեզում տեղ գտած տեղեկատվությունը համապատասխանում է իրականությանը:
Այսօրվա դրությամբ հայտնաբերված շատ նավթահանքեր նշված են այդ քարտեզում: Դրանում նշված են նաև Բաթմանն ու Ադըյամանը, որոնցում մենք նավթ ենք որոնում: Վերջին 10 տարիներին մենք նավթի որոնման համար բյուջեից տարեկան հատկացրել ենք 1.1 միլիարդ դոլար»:
