4 երեխաների մայր, 48-ամյա Իրինա Այվազյանի երեխաները, առանց մոր իմացության վաճառելով իրենց բնակարանը, մորը գցել են փողոց՝ թողնելով բախտի քմահաճույքին։ Բախտը կնոջից երես է թեքել, քանի որ նրա երեք աղջիկները, որոնք ամուսնացած են, հրաժարվել են մորը ապաստանել։
Փողոցում հայտնված կինը ստիպված ապաստանել է Դավիթաշենի 4-րդ թաղամասում գտնվող կիսաքանդ դպրոցում, որը աղբանոցից ոչնչով չի տարբերվում։ Նույնիսկ մենք նկարահանման ժամանակ դժվարացանք այնտեղ երկար մնալ, քանի որ մի կողմից հոտն էր ճնշում, մյուս կողմից՝ տանիքն էր կաթում ու քանդվում մեր գլխավերևում։ Իսկ գիշերները, եթե քամին թողնում է, կինն անցկացնում է մոմի լույսի տակ, շների, կատուների ու առնետների ընկերակցությամբ։
Ինչպես տեղեկացանք կնոջ պատմածներից, ավելի ցավալի էր կնոջ՝ փողոցում հայտնվելու պատճառը։ Իրինայի մորաքույրը երեխաներ չի ունեցել և խնդրել է, որ նա իր 4 երեխաներից մեկին տա իրեն։ Իրինան համաձայնել է և իր աղջիկներից Մարիամին, որը այսօր նրան գցել է փողոց, տվել մորաքրոջը։ Սակայն երբ Մարիամը դառնում է 8 տարեկան, նրա երկրորդ մայրը մահանում է, հետևաբար աղջկա խնամակալությունը կրկին Իրինան է ստանձնում։ Մորաքրոջ տունը ինքնըստինքյան անցնում է Մարիամին։
Ընտանիքը համերաշխ ապրում է, մինչև Մարիամը դառնում է չափահաս և ծանոթանում Օգսեն անունով 30- ամյա մի տղամարդու հետ։ Մեկ շաբաթում տղամարդը աղջկան համոզում է, որ եթե ցանկանում է իրենց հարաբերությունները շարունակվեն, տունը վաճառի և գումարը տա իրեն։ Համաձայնության եկած զույգը Իրինայի բոլոր փաստաթղթերը, անձնագրից սկսած, վերցրել են և առանց Իրինայի համաձայնության ու գիտության, տունը վաճառել են ու հեռացել։ Իրինան տան վաճառքի մասին իմացել է միայն տան նոր տերերից և հայտնվել փողոցում։ Մանրամասները Իրինան պատմում է մեր տեսաշարում։ Սոցապ նախարարությանը մենք ներկայացրինք եղելությունը, և նրանք խոստացան այսօր տեղեկացնել՝ կարո՞ղ են Իրինային ժամանակավոր կացարան տրամադրել, թե՞ ոչ։
ՀԳ.- Այս տեսագրությունը և նյութը տեղադրելուց վայրկյաններ առաջ տեղեկացանք, որ մի խումբ ոստիկաններ ներխուժել են Իրինա Այվազյանի ժամանակավոր ապաստարանը և նրան դուրս վռնդել այնտեղից:
