ՀԱԿ-ը ակտիվություն չի ցուցաբերում ՏԻՄ ընտրություններում, որովհետև անիմաստ է համարում այս ընտրապայքարը: Այսօր լրագրողների հետ հանդիպմանը այս մասին ասաց ՀԱԿ անդամ, ԿԲ նախկին նախագահ Բագրատ Ասատրյանը:
«Ներքաղաքական վիճակ չկա, կա իշխող ուժ, որը հնարավոր բոլոր մեթոդներով փորձում է վերարտադրվել: «Քաղաքականություն» բառը ՏԻՄ ընտրություններում գոյություն չունի: Կան ինչ-որ անձինք, ովքեր պատասխանատվություն են կրում վերևների առջև և պետք է իրագործեն այն, ինչ պետք է իրագործեն: Մեր երկրում համայնքապետի միակ գործառույթը ընտրություններ կազմակերպելն է և հաջորդ ընտրություններին իշխողին ձայն ապահովելը»,- ասաց նա:
Ըստ Բագրատ Ասատրյանի՝ նախագահական ընտրությունները այլ են, քանի որ ավելի բարձր մակարդակով են անցնում: Նախագահական ընտրություններում խախտումների շանսն ավելի փոքր է, քանի որ հսկվում է միջազգային դիտորդների կողմից:
Բագրատ Ասատրյանի ընդդիմախոս` ԱԺ ՀՀԿ-ական պատգամավոր Մանվել Բադեյանը նշեց, որ ընդդիմությունը մոռանում է՝ ընտրությունը կատարում են մարդիկ՝ գաղտնի քվեարկության եղանակով:
«Ասել, որ էդ մարդու վրա կարող են ազդել հաթաթաները, կաշառքները, չեմ իմանում՝ ինչ կարող է ազդել, նշանակում է նվաստացնել էդ մարդու դերը, սարքել նրան կառավարվող մի անասուն: Այդպիսին չէ ոչ հայ մարդը, ոչ հայ ժողովուրդը` ամբողջովին»,- ասաց նա:
Ըստ Մանվել Բադեյանի՝ եթե ՏԻՄ ընտրությունների արդյունքը չի բավարարում ընդդիմությանը, ապա պատճառը պետք է փնտրեն իրենց մեջ, ոչ թե իշխանության:
Միաժամանակ ՀՀԿ անդամը նշեց, որ ընտրությունների ժամանակ խախտումներն անխուսափելի են: «Դատապարտելի է նաև էն, որ որոշ գյուղապետեր զբաղված են ընտրություններով և ոչ թե իրենց գործառույթներով: Կան էդպիսի բաներ. սրանք խնդիրներ են, որոնք պետք է լուծվեն: Բայց պետք չէ ասել` եթե մի բան հայտնաբերվել է, ուրեմն ամբողջ ընտրություններն են կեղծված»,- ընդգծեց նա:
Միաժամանակ, ՀՀԿ-ական պատգամավորը նշեց, որ ընդդիմությունն էլ է հարկ եղած ժամանակ խախտումների դիմում: «Օպոզիցիան կեղծիք չի՞ անում: Հայտնի չե՞ն ձեզ «կարուսելները» Գյումրիում. կուսակցության անունը չեմ ուզում տալ»,- ասաց նա:
ՀՀԿ գործչի խոսքով՝ այն, որ ընդդիմությունը չի մասնակցում ՏԻՄ ընտրություններին, ունի մեկ բացատրություն՝ չունեն ռեսուրսներ: «Չեն կարողանում մարդկանց ձայները ստանալ, դրա համար էլ բողոքում են` ոչ թե իրենց չարածի համար, այլ ուրիշի արածի համար»,- ընդգծեց նա:
