Բանկային քարտերի կեղծ կրկնօրինակներով Հայաստանի տարածքում գործող բանկերի բանկոմատներից հափշտակություններ իրականացրած օտարերկրացի Դրագոշ Իոնուց Բոտեզատուի դատավարությունը, որն արդեն հասել է դատական վիճաբանությունների փուլին, այսօր կրկին հետաձգվեց:
Բոտեզատուի պաշտպան, փաստաբան Սարգիս Ասլանյանը «Առաջին լրատվական»-ի հետ զրույցում նշեց, որ մեղադրանքի մեջ թվային տարբերություններ են հայտնաբերվել, և հնարավոր է` մեղադրանքի ծավալը փոփոխվի, այդ իսկ պատճառով գործով մեղադրող դատախազի միջնորդությամբ դատական նիստը հետաձգվել է մինչև սեպտեմբերի 27-ը:
Նշենք, որ դատարանում օտարերկրացու մեղքը լիովին ապացուցվել է, և, ըստ երևույթին, նա կդատապարտվի ազատազրկման իրեն առաջադրված հոդվածներով սահմանվող պատժաչափով, այն է` 8-9 տարի ժամկետով:
Դրագոշ Իոնուց Բոտեզատուին մեղադրանք է առաջադրվել այն բանի համար, որ նա «Քիշտրուլյա» մականվամբ համերկրացու, ըստ չճշտված տվյալների` Ռումինիայի քաղաքացի Կոստել Շերբանի հետ 2008 թվականի օգոստոս ամսին տեղեկանալով, որ վերջինս նպատակադրվել է բանկային քարտերի կեղծ կրկնօրինակներով հափշտակություններ իրականացնել Հայաստանի տարածքում գործող բանկերի բանկոմատներից, համաձայնել է մասնակցել այդ գործին և ընդգրկվել է «Քիշտրուլյա»-ի և Լոնդոնում բնակվող վերջինիս քենակալի՝ Բաքվում ծնված Ռումինիայի քաղաքացի Մարիուս Լուպուի կողմից էթնիկական և համերկրացիական սկզբունքով կազմակերպված հանցավոր կայուն խմբի կազմում՝ Բաքու քաղաքում ծնված Կատալին Իոնուց Ապետրի Ֆուրդուի հետ միասին։
Դերաբաշխման համաձայն՝ «Քիշտրուլյա»-ին և Մարիուս Լուպուին վերապահվել է խմբի անդամների գործողությունները կազմակերպելու և համակարգելու, գողության համար գործիք հանդիսացող բանկային քարտերի կեղծ կրկնօրինակներով ապահովելու պարտականությունը, իսկ նրան և Կատալին Իոնուց Ապետրի Ֆուրդուին՝ բանկոմատներից անմիջականորեն գումարներ հափշտակելու, ինչպես նաև ՀՀ դրամի տեսքով գողոնր տարադրամով փոխանակելու և բանկային փոխանցումների միջոցով գումարը կազմակերպչի մատնանշած անձանց ուղարկելու պարտականությունը:
