Որոշ մանկաբույժների կարծիքով՝ կաթի մեջ որևէ հավելանյութի առկայությունը պետք է բացառել, հատկապես մինչև 3 տարեկան երեխաների սննդակարգում: Ըստ մասնագետների՝ դա վերաբերում է նաև սոդային:
Սակայն Բժշկական գիտությունների թեկնածու, դոցենտ, ԵՊԲՀ-ի Մանկաբուժության թիվ 2 ամբիոնի մանկաբույժ Զավեն Մելքոնյանի տեսակետով, կաթի մեջ սոդայի առկայությունը երեխաների առողջության համար այնքան էլ վտանգավոր չէ, իսկ եթե սոդան շատ է լցվում, դա փոխում է կաթի թթվայնության աստիճանը:
«Օրինակ՝ եթե մածունը շատ թթու է, ես նույնիսկ խորհուրդ եմ տալիս մածունի մեջ 1-2 պտղունց սոդա լցնել, լավ խառնել, այնուհետև օգտագործել, այլապես երեխայի մոտ արհեստական այրոց է առաջանում: Կաթի հետ, չեմ կարծում, որ վնասի, բայց, իհարկե, դա կախված է սոդայի քանակից»,- «Առաջին լրատվական»-ի հետ զրույցում ասաց Զ.Մելքոնյանը:
Իսկ թե ի՞նչ կլինի կաթի մեջ սոդայի քանակի շատ լինելու դեպքում, Զ.Մելքոնյանը պատասխանեց, որ այդ դեպքում կաթի համն այնպես է փոխվում, որ երեխան ուղղակի չի ուտի այն:
Հիշեցնենք, որ Սննդամթերքի անվտանգության պետական ծառայությունը խանութներից վերցված նմուշներում 11 արտադրողների կաթի մեջ սոդա էր հայտնաբերել: Ներկայում իրականացվում են տեսչական ստուգումներ «Անի», «Թամարա», «Բիոկաթ», «Դուստր Մարիաննա», «Արզնու Տոհմային ԹԽՏ», «Աշտարակ Կաթ», «Մուլտի Ագրո» և «Թամարա» ընկերություններում՝ պարզելու, թե սոդայի կեղծվածության գործընթացը որ փուլում է տեղի ունեցել:
Հավելենք նաև, որ սոդան չոր կաթի մեջ ավելացվում է` մթերքի պահպանման ժամկետը երկարացնելու համար: Ռուսգյուղակադեմիայի կաթնամթերքի արտադրության ԳՀԻ-ի հետազոտությունների համաձայն՝ չոր փոշուց ստացված կաթի մշակման բարդ գործընթացի, օրինակ՝ բազմակի տաքացման ժամանակ, սոդան ռեակցիայի մեջ է մտնում կաթի սպիտակուցների հետ, ինչի հետևանքով ամոնիակ է առաջանում: Կուտակվելով օրգանիզմում` ամոնիակը գրգռում է աչքերի լորձաթաղանթն ու վերին շնչուղիները, առաջացնում չորություն ու հազ, իսկ եթե թանձր է՝ շնչարգելություն:
