Լեդի Գագայի նոր ARTPOP ալբոմը կթողարկվի ոչ միայն ավանդական ձևաչափով և թվային ձևով ներբեռնման համար, այլև հեռախոսային հավելված կդառնա: Այս մասին երգչուհին հայտնել է իր երկրպագուների սոցցանցում` Littlemonsters.com-ում:
Երգչուհու երրորդ ստուդիական ալբոմը կթողարկվի որպես iPad-ի, iPhone-ի և այլ հեռախոսների համար նախատեսված հավելված: Երգչուհու խոսքով` հավելվածը կունենա շփման հնարավորությամբ չաթեր և երկրպագուների համար խաղեր: Այն նաև կպարունակի սովորական թողարկման համար անհասանելի բոնուս-կատարումներ և տեսահոլովակներ յուրաքանչյուր երգի համար: Լեդի Գագան մտադիր է պարբերաբար թարմացնել հավելվածը և դրա միջոցով շփվել ֆանատների հետ:
Սպասվում է, որ ARTPOP-ը լույս կտեսնի 2013-ի սկզբին: Ավելի վաղ տեղեկություն էր հայտնվել, որ Գագան դուետ է ձայնագրել Էմինեմի հետ, բայց հետո ռեփերի ներկայացուցիչները դա հերքել են:
Ներկայումս Գագան համաշխարհային համերգային շրջագայության է: Դեկտեմբերի 9-ին նա ելույթ կունենա Սանկտ Պետերբուրգում, իսկ դեկտեմբերի 12-ին` Մոսկվայի «Օլիմպիական»-ում:
