Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում՝ դատավոր Արթուր Մկրտչյանի նախագահությամբ, վաղը կշարունակվի ընտրակաշառք բաժանած ԲՀԿ անդամ Արմեն Մաթևոսյանի դատը:
2012թ. մայիսի 6-ի ՀՀ ԱԺ ընտրություններին ԲՀԿ-ի օգտին ընտրակաշառք բաժանելու գործով դատը կանցնի արագացված ընթացակարգով: Դատարանին նման միջնորդություն էր ներկայացրել գործով ամբաստանյալ Մաթևոսյանը՝ ընդունելով իր մեղքը: Միջնորդությունը չէր առարկել մեղադրող դատախազ Հարություն Հարությունյանը, իսկ դատարանը բավարարել էր այն:
Հիշեցնենք, որ քրեական գործի նախաքննությամբ պարզվել և հիմնավորվել էր, որ ԲՀԿ անդամ Ա. Մաթևոսյանը 2012թ. ապրիլի կեսերին քաղաքացի Ծ. Կ.-ին տվել է 10 000 դրամ ընտրակաշառք, ապրիլի 27-ին Հ. Ջ.-ին տվել է 35 000 դրամ, իսկ մայիսի 5-ին համապատասխանաբար` 15 000 և 35 000 դրամ ընտրակաշառք է տվել Հ. Ն.-ին և Հ. Ա.-ին, որպեսզի վերջիններս և նրանց ընտանիքի անդամները 2012թ. մայիսի 6-ի ՀՀ ԱԺ ընտրություններում քվեարկեն «Բարգավաճ Հայաստան» կուսակցության օգտին` այդ կերպ խոչընդոտելով ընտրողների կամքի ազատ իրականացմանը:
Ձեռք բերված ապացույցների հիման վրա Ա. Մաթևոսյանին մեղադրանք է առաջադրվել ՀՀ քրեական օրենսգրքի 154.2-րդ հոդվածի 2-րդ մասով:
