Ամերիկացի նորաձևները երազում են Միշել Օբամայի վարդագույն մետաքսե զգեստի մասին, որով ԱՄՆ առաջին տիկինը հայտնվել էր Հյուսիսային Կարոլինա նահանգի Շարլոտ քաղաքում անցկացվող Դեմոկրատական կուսակցության համագումարում երեկ ունեցած ելույթի ժամանակ: Այդ զգեստը դեռևս վաճառքի չի հանվել, սակայն արդեն դարձել է համացանցում առևտրի առարկա:
Սոցիալական ցանցերում նորաձևները ակտիվ քննարումներ են ծավալել դիզայներ Թրեյսի Ռիզի կարած զգեստի թեմայով: Այս մասին հաղորդում է ITAR-TASS-ը:
Ավանդույթի համաձայն` Սպիտակ տան զգեստապահարանի շատ իրեր դրվում են բարեգործական աճուրդի: Նման ճակատագիր է սպասվում նաև վարդագույն զգեստին, որով Միշել Օբաման երևում էր համեստ, սակայն շատ էլեգանտ:
«Հպարտանում եմ, որ նա ընտրել է իմ ստեղծած զգեստը նման կարևոր իրադարձության համար»,- ասել է Թրեյսի Ռիզը, որը կիրակի նյույորքյան նորաձևության շաբաթվա շրջանակում կներկայացնի իր նոր հավաքածուն:
ԱՄՆ առաջին տիկինն առաջին անգամ չէ իր համար զգեստ ընտրում Թրեյսի Ռիզի հավաքածուից: Նոր զգեստի հստակ գինը հայտնի չէ, սակայն դիզայների հավաքածուի նմանօրինակ զգեստներն արժեն 400 դոլար: Կուսակցական ակտիվիստների կարծիքով` դա լիովին դեմոկրատական գին է:
Հիշեցնենք, որ անցած շաբաթ տեղի ունեցած Հանրապետական կուսակցության համագումարում նախագահի հանրապետական թեկնածու Միթ Ռոմնիի կինը` Էն Ռոմնին հայտնվել էր միջոցառմանը Օսկար դե լա Ռենտի` 1990 դոլար արժողությամբ կարմիր զգեստով:
