18 տարին չլրացած երկու աղջիկների սեռական շահագործման նպատակով հավաքագրած և ՀՀ պետական սահմանը հատելով` Հայաստանից Ռուսաստանի Դաշնություն տեղափոխած Ռաֆիկ Մարկոսյանի գործով դատավարությունը շարունակվում է Երևանի Շենգավիթ վարչական շրջանի ընդհանուր իրավասության դատարանում, սակայն գործով մեղադրյալ` 1989 թվականին ծնված Ռաֆիկ Մարկոսյանը մինչ օրս չի ընդունել մեղադրանքը:
Ըստ դատական գործի մեղադրական եզրակացության համառոտ բովանդակության` Ռաֆիկ Մարկոսյանին մեղադրանք է առաջադրված այն բանի համար, որ 2011թ. հուլիս ամսին անչափահասներ` 18 տարին չլրացած Աստղիկ Խորենի Գալստյանին և Էլեն Գրիգորյանին սեռական շահագործման նպատակով հավաքագրելու և ՀՀ պետական սահմանը հատելով` Հայաստանից Ռուսաստանի Դաշնություն նրանց տեղափոխումը կազմակերպելու և այնտեղ վերջիններիս պոռնկության շահագործման դիտավորությամբ նախնական համաձայնության է եկել իր հետ սիրային կապի մեջ գտնվող Քրիստինե Անդրանիկի Ներսիսյանի հետ: Ռաֆիկ Մարկոսյանն այնուհետ Աստղիկ Գալստյանի հետ ամուսնանալու, նրան ՌԴ Վոլգոգրադ քաղաք` իր ծնողների մոտ մշտական բնակության տեղափոխելու, այնտեղ ընտանեկան բարեկեցիկ կյանքով ապրելու կեղծ խոստումներով հավաքագրել է նրան: Երիտասարդը որպես այդ խոստումների հավաստիք` իր հանցակից Քրիստինե Ներսիսյանին Աստղիկ Գալստյանի հարազատների և մտերիմների շրջանում իբրև իր մորաքրոջ աղջիկ է ներկայացրել և այդ կերպ չարաշահել իր զոհերի վստահությունը:
Քրիստինե Ներսիսյանի հետ նախնական համաձայնությամբ Մարկոսյանը միաժամանակ ՌԴ Վոլգոգրադ քաղաք տեղափոխելու և իրենց հետ համատեղ բարեկեցիկ կյանքով ապրելու կեղծ խոստումներով փորձել է հավաքագրել նաև Աստղիկ Գալստյանի ընկերուհուն` էլեն Գրիգորյանին, սակայն հանցավոր զույգը չի կարողացել հանցավոր մտադրությունն ավարտին հասցնել, քանի որ վերջինս հրաժարվել է մեկնել ՌԴ:
Հանցավոր մտադրությունն իրագործելու նպատակով Ռաֆիկ Մարկոսյանը, Քրիստինե Ներսիսյանի հետ նախնական համաձայնությամբ, 2011թ. հուլիսի 10-ին ՀՀ Բագրատաշենի սահմանային կետով Աստղիկ Գալստյանին շահագործման նպատակով տեղափոխել է ՌԴ Մինվոդի քաղաք, որտեղ վերջինիս փախուստը կանխելու նպատակով վերցրել են նրա անձնագիրը, ապա Աստղիկ Գալստյանի նկատմամբ բռնություն գործադրելով` նրան ծեծի ենթարկելով և այդպիսիք գործադրելու սպառնալիքներով, փորձել են ներգրավել պոռնկության մեջ` ստիպելով զբաղվել մարմնավաճառությամբ և աշխատած գումարները փոխանցել իրենց: Տեսնելով, որ վերջինս համառորեն հրաժարվում է, նրան ներգրավել են այլ շահագործման` հարկադիր աշխատանքի մեջ, և 2011թ. հուլիսի 12-ից մինչև հուլիսի 28-ը շահագործել են` պարտադրելով Մինվոդի քաղաքին հարակից Նագուտսայա գյուղում գբաղվել հողագործությամբ:
Այս պահին Ռաֆիկ Ավետիսի Մարկոսյանի նկատմամբ մեղադրանք է առաջադրված ՀՀ քրեական օրենսգրքի մի քանի հոդվածներով` 34-132.2-րդ հոդվածի 2-րդ մասի 1-ին, 2-րդ, 7-րդ կետերով և 132.2-րդ հոդվածի 2-րդ մասի 2-րդ, 4-րդ և 7-րդ կետերով:
Ներկայումս կալանավորված 23-ամյա երիտասարդի պաշտպան, ՀՀ փաստաբանների պալատի անդամ Մարինե Թովմասյանը «Առաջին լրատվական»-ի հետ զրույցում նշեց, որ դատական գործն այժմ դատաքննության փուլում է, սակայն իր պաշտպանյալը համաձայն չէ մեղադրանքի հետ: