Երբ մարդը բիզնես է դնում, մտածում է՝ ինչպես շահագրգռել հաճախորդին, որ իր բիզնեսը զարգանա: Եղեգնաձորի բնակիչ, 29-ամյա Գևորգ Բաբայանն էլ, քանի որ տնտեսագիտական բարձրագույն կրթություն չի ունեցել, բիզնեսը զարգացնելու կարճ ճանապարհն է գտել. որոշել է Աղավնաձորում «աղավնաբուն» բացել ու «ծտերով» լցնել:
Ըստ քրեական գործի նյութերի՝ այս տարվա սկզբին Գևորգը Երևանից Աղավնաձոր է հրավիրել Խոսրանուշ Հարությունյանին, Տավուշի մարզի գյուղերից մեկի բնակչուհի Անուշ Սաֆարյանին, չգիտեմ որտեղի բնակչուհի Լուսինե Ավետիսյանին՝ համատեղ «մաքուր-բիզնես» իրականացնելու: Նրանց բերել է Վայոց ձորի մարզի «Աղավնաձորի շուկա» կոչվող տարածք ու մոտավորապես ասել՝ «աղջկերք, էս իմ սեղանիկն ա, էս կողքի օբյեկտն էլ՝ ձեր համար եմ վարձել: Որպեսզի ցուցանակ չկպցնենք, որ ստեղ կարող են սեռական՝ ձեր ծառայություններից օգտվել, ու հետո էլ ոստիկանները չբռնեն, հաճախորդները կգան՝ իմ մոտից առևտուր կանեն, ես էլ կնայեմ՝ եթե հարմար փող տվող կլիենտ լինի՝ կասեմ ձեր տեղը: Համ դուք փող կաշխատեք, համ էլ իմ սեղանիկից առևտուր կանեն»: Դե քանի որ ձմեռ է եղել, դուրսն էլ՝ ցուրտ, եռյակը համաձայնել է «տաքուկ» առաջարկին: Գևորգը նրանց համար «բրոնյա» է արել Սեդրակ Ղևոնդյանին պատկանող, «Աղավնաձորի շուկա» կոչվող տարածքում գտնվող բաղնիքների և ցնցուղարանների համար նախատեսված հանրային հաստատությունը՝ սաունան, որը նա վարձակալությամբ օգտագործել է եռյակին պոռնկության մեջ ներգրավելու նպատակով: Վարձելով այն՝ Գևորգը օգուտ ստանալու ակնկալիքով սաունան պարբերաբար տրամադրել է Խոսրանուշին, Լուսինեին և Անուշին: Վերջիններս հաճախորդների դրամական վարձատրության դիմաց զբաղվել են պոռնկությամբ, իսկ Գևորգն այդ կերպ հաճախորդներին գրավել է դեպի իր հաստատություն և միաժամանակ առևտուր կազմակերպելով՝ ստացել գույքային օգուտ:
Բիզնեսն, իհարկե, 4 ամիս է տևել՝ 2012-ի փետրվարի 1-ից մինչև մայիսի 1-ը: Այսինքն, հնարավոր է՝ շատ ավելի կարճ, քան այն հնարավոր պատժաժամկետը, որը Գևորգը կարող է ստանալ քրեական պատասխանատվության ենթարկվելուց հետո: Այժմ Գևորգ Բաբայանին մեղադրանք է առաջադրված քրեական օրենսգրքի երկու հոդվածներով ՝ 261-րդ հոդվածի 2-րդ մասի 5-րդ կետով (շահադիտական նպատակով երկու և ավելի անձանց պոռնկությամբ զբաղվելուն ներգրավելը) և 262-րդ հոդվածի 2-րդ մասի 5-րդ կետով (պոռնկությամբ զբաղվելուն նպաստելը երկու և ավելի անձանց օգտագործելով): Երկու հոդվածներից յուրաքանչյուրի սանկցիան նախատեսում է 3-ից 6 տարի ազատազրկում:
Այժմ գործը Արարատի և Վայոց ձորի մարզերի առաջին ատյանի դատարանում է, և քանի որ «աղավնատան» աղջիկներն ու այլ վկաներ չեն գալիս դատարան՝ ցուցմունք տալու և ասելու, թե ով ում քանի անգամ է ծառայություն մատուցել, որ ծառայության դիմաց որքան գումար է աշխատել չորս ամիսների ընթացքում և որքան գույքային օգուտ է տվել Գևորգին, դատարանը նրանց բերման ենթարկելու որոշում է կայացրել:
Հ.Գ. Դա էլ Գևորգի «մաքուր-ընկերական բիզնեսը»՝ ինքը նրանց չի բռնաբարել կամ «կպել» և աշխատել է ապրանքս առեք՝ «պոռնիկները» «բոնուսոտ» սկզբունքով…