Ինչպես հաղորդում է Reuters գործակալությունը, փետրվարի 23-ին լիբիական Arab Airlines ավիաընկերության ATR42 ինքնաթիռը մոտեցել է Մալթային, սակայն իրավունք չի ստացել վայրէջք կատարելու: Առանց նախապես համաձայնեցնելու ինքնաթիռն ուղղվել է դեպի Մալթա: Կղզու մատույցներում օդանավի անձնակազմը խնդրել է վայրէջք կատարել, սակայն իրավունք չստանալով` որոշում է կայացրել վերադառնալ հետ Լիբիա:
Արաբական որոշ աղբյուրներ տեղեկացնում են, որ ինքնաթիռում է եղել Լիբիայի ղեկավար Մուամար Քադաֆիի դուստրը:
«Առաջին լրատվականն» այսօր տեղեկացրել էր նաև, որ փետրվարի 22-ին ևս մեկ ինքնաթիռ ուղղվել է դեպի Լիբանան, սակայն նույնպես չի կարողացել վայրէջք կատարել, քանի որ ինքնաթիռի անձնակազմը հրաժարվել է հայտնել, թե ովքեր են գտնվում օդանավում, որից հետո Ռաֆիկ Հարիրիի անվան օդանավակայանը հրաժարվել է այն ընդունելուց: Որոշ տեղեկությունների համաձայն` ինքնաթիռում են եղել Քադաֆիի ընտանիքի անդամները, այդ թվում որդին ու հարսը, որն ունի լիբանանյան քաղաքացիություն:
