«Ժառանգություն»-ը ՏԻՄ ընտրություններում ամենևին էլ պասիվ չէ: Այսօր լրագրողների հետ հանդիպմանը այս մասին ասաց «Ժառանգութուն» խմբակցության պատգամավոր Զարուհի Փոստանջյանը՝ կարևորելով ՏԻՄ ընտրությունները հայ քաղաքական զարգացումներում: Նա տեղեկացրեց, որ շուրջ երկու տասնյակ թեկնածու են առաջադրել, իսկ Գյումրիում դաշնակցական թեկնածուին են սատարում: Տեղեր կան, որտեղ նույնպես պաշտպանում են ընդդիմադիր կուսակցությունների թեկնածուների:
«Կարևորում ենք ՏԻՄ ընտրությունները, դրանք ունեն իրենց առանձնահատկությունները, կարևոր է, որ բոլոր կուսակցություններն իրենց թեկնածուներով ներկայացված լինեն ընտրական հանձնաժողովներում: Մեր մասնակցությունը ևս կարևորում եմ:
Շատ հաճախ ՏԻՄ ընտրություններում նշանակություն են ունենում հարազատական և բարեկամական կապերը, ուստի խոչընդոտներն ավելի շատ են լինում, և բոլոր կուսակցությունները լիարժեք հնարավորություն չեն ունենում մասնակցելու ՏԻՄ ընտրություններին»,- մանրամասնեց իր տեսակետը պատգամավորը:
Ըստ պատգամավորի՝ «Ժառանգություն»-ը ոչ միայն իր ավագանիներով է մասնակցելու, այլև վերլուծություններով, դիտարկումներով, հանձնաժողովներում կայացվածությամբ: Այս ամենին զուգահեռ՝ Զարուհի Փոստանջյանը հստակեցրեց, որ իրենց մասնակցությունը բավարար չեն համարում, սակայն պասիվ էլ չեն:
