Իսպանիայում ձերբակալված հակաֆաշիստ Պյոտր Սիլաևը ազատ է արձակվել: Այս մասին Facebook-ի իր էջում գրել է Ֆինլանդիայում բնակվող իրավապաշտպան Օկսանա Չելիշևան:
Նրա խոսքով` Սիլաևը ազատվել է օգոստոսի 30-ին իսպանացի պրոֆեսորի երաշխիքով, որը երաշխավորել է, որ ակտիվիստը չի հեռանա Իսպանիայից մինչ արտահանձնման մասին գործի քննության ավարտը:
Ռուսաստանը պահանջում է հակաֆաշիստին հանձնել իրեն: Իրավապահ մարմինները Սիլաևին համարում են 2010 թ. Խիմկիի ադմինիստրացիայի ավերման կազմակերպիչը։
Պյոտր Սիլաևը ձերբակալվել էր իսպանական Գրանադա քաղաքում օգոստոսի 21-ին: Ինչպես գրում է Չելիշևան, այն հոսթել, որտեղ բնակվել է ակտիվիստը, ներխուժել են զինված ոստիկաններ ու տարել նրան: «Ազատություն» ռադիոկայանի հաղորդմամբ` Սիլաևը տեղափոխվել է Սոտո-դել-Ռաել բանտ:
Սիլաևի գործը քննում է Ազգային դատական պալատը:
Սիլաևը Ռուսաստանից հեռացել էր Խիմկիի դեպքերից հետո: Նա շուրջ 2 տարի անօրինական կերպով ապրել է արտերկրում, իսկ 2012 թ. ապրիլին Ֆինլանդիան նրան քաղաքական ապաստան տրամադրեց:
Իսպանիան ստորագրել է Փախստականների մասին կոնվենցիա: Համաձայն այդ փաստաթղթի` նա իրավունք չունի փախստականին հանձնել այն երկրին, որտեղից նա փախել է:
Խիմկիի ակիցիաներին 2010 թ. մասնակցել է շուրջ 400 մարդ: Նրանք Խիմկիի ադմինիստրացիայի վրա նետել էին քարեր` ի պաշտպանություն Խիմկիի անտառի: