Այս տարի գայլերի որսը թույլատրված է: Այս մասին «Առաջին լրատվական»-ի հետ զրույցում ասաց բնապահպան, Էկոլոգիական դաշինքի համակարգող Սիլվա Ադամյանը. «Գայլերի որսի մասին ամեն տարի թույլտվություն չէին տալիս, սակայն այս տարի մի քանի տասնյակ գայլի որսը թույլատրվում է, և սա շատ ճիշտ է, որովհետև եթե որսաշրջանի ժամանակ որսը նորմալ կատարվի, պոպուլյացիան ինքնակառավարման կենթարկվի և կվերականգնվի»:
Նա ցավով նշեց, որ մեզանում ապօրինի որսը շատ տարածված է, որի հետևանքով որսվում են Կարմիր գրքում զետեղված տեսակներ. «Մենք ունենք լուսանկարներ Արմաշից, որտեղ կարմիրգրքային տեսակները որսված շարված են տանիքի վրա: Ասեմ, որ ՀՀ-ում բացի անօրինական որսից, ուժեղ թափ է առել տուրիստական որսորդությունը, որը սկսվել է հենց Արմաշի լճերից: Մի քանի տարի առաջ մի իտալացի գործարար սկսել էր Արմաշում իրականացնել որսորդական տուրիզմ, դա շարունակվեց նաև Վայքում, որտեղ կատարվում էր բեզոարյան այծի որս»:
Բնապահպանը նշեց, որ իրենց աղբյուրների համաձայն՝ այս կենդանիները որսվում էին միջինը 500 եվրոյի դիմաց: Նա ասաց նաև, որ որս են կատարում նաև ուղղաթիռով. «Օդից կրակում են այծյամի վրա՝ հենց բազմացման շրջանում, անգամ եթե կենդանին հղի է»: Բնապահպանի կարծիքով՝ որսորդությունը մշակույթ է, որ պիտի ձևավորվի օլիգարխիայի, կառավարության և այն բոլոր մարդկանց մեջ, ովքեր մտածում են միայն իրենց հաճույքի մասին և հաշվի չեն առնում, որ տվյալ կենդանին վերացման եզրին է:
