Գյումրիում այսօր անցկացվել է աշխատանքի չորրորդ տոնավաճառը: Գյումրու դրամատիկական թատրոնի ճեմասրահը լեփ-լեցուն էր գործազուրկներով: Անկախ տարիքից, մասնագիտությունից և սեռից,գյումրեցի գործազուրկներից շատերը շտապել էին մասնակցելու տոնավաճառին՝ հույս ունենալով, որ աշխատանք կգտնեն:
Աշխատանքի տոնավաճառին մասնակցելու հայտ էր ներկայացրել 32 գործատու: Այն, որ գործազրկության մակարդակը Շիրակի մարզում շարունակում է մնալ ամենաբարձրը, «Առաջին լրատվական»-ի թղթակցի հետ զրույցում մեկ անգամ ևս հաստատեց «Զբաղվածություն պետական ծառայություն» գործակալության պետ Սոնա Հարությունյանը:
Հարկ է նշել, որ գործազրկության բարձր մակարդակը նվազեցնելու մասին հայտարարություններ հայաստանյան իշխանությունների կողմից բազմիցս են արվել: Հատկապես Գյումրիում աշխատատեղեր ստեղծելուն «նպաստ» բերելու պատրաստակամություն բազմիցս են հայտնել նաև տեղի իշխանությունները: Սակայն Աշխատանքի տոնավաճառին Շիրակի մարզպետ, գեներալ Աշոտ Գիզիրյանը չէր ներկայացել: Նրա ողջունի խոսքը ներկաներին փոխանցեց փոխմարզպետ Հարություն Արշակյանը:
Գյումրեցի գործազուրկներից շատերը այս անգամ էլ հիասթափություն ապրեցին, երբ մեկ առ մեկ ուսումնասիրեցին գործատուների առաջարկները և իրենց մասնագիտությանը համապատասխան աշխատանք գտնել չկարողացան: «20-25 տարեկան, բարետես, երկար ոտքերով, չիդեմ ինչերով աղջիկ գուզեն սաղ, ես որ 40 տարեկան եմ՝ աշխատել չեմ կարող»,- «Առաջին լրատվական»-ի թղթակցի հետ զրույցում դժգոհեց տոնավաճառին ներկա գործազուրկ կանանցից մեկը:
