Օրերս, երբ ԲՀԿ մամուլի քարտուղար Տիգրան Ուրիխանյանին լրագրողները հարց էին ուղղել կուսակցության թիկունքում Ռոբերտ Քոչարյանի առկայության մասին, նա պատասխանել էր, թե ԲՀԿ թիկունքում 500 հազար քվե է առկա: Տիգրան Ուրիխանյանը հավանաբար նկատի ունի խորհրդարանի մայիսի 6-ի ընտրության պաշտոնական արդյունքը, որի ձևավորման գործում, օրինակ, զգալի դեր խաղացին տրակտորները: Այսինքն` այդ 500 հազար քվեն ոչ միայն ԲՀԿ-ի, այլև առնվազն ինչ-որ մասով էլ տրակտորների թիկունքին է: Սակայն խնդիրը տվյալ պարագայում սա չէ:
Տիգրան Ուրիխանյանը ըստ երևույթին ակնարկում է այն, որ Ռոբերտ Քոչարյանը եթե նույնականացվում է ԲՀԿ-ի հետ, ապա այդպիսով նա ինքնաբերաբար նույնականացվում է նաև 500 հազար ընտրողի հետ, որ ձայն է տվել ԲՀԿ-ին: Այսինքն` այդպիսով փորձ է արվում Ռոբերտ Քոչարյանի համար ապահովել առնվազն բազային այն հասարակական աջակցությունը, որը նա մի առիթով իր հարցազրույցներից մեկում վկայակոչել էր որպես իր վերադարձի անհրաժեշտ երեք պայմաններից մեկը:
Այսինքն` ԲՀԿ-ն բավական թափանցիկ կերպով փորձում է արդեն դնել Ռոբերտ Քոչարյանի քաղաքական վերադարձի հասարակական հիմքերը, և ըստ երևույթին դրա վրա շենքի կառուցումը պայմանավորված կլինի այն հանգամանքով, թե ինչպիսի արձագանք կունենա ԲՀԿ-ի այդ փորձը հասարակության շրջանում: Իսկ որ Ռոբերտ Քոչարյանը` ի դեմս ԲՀԿ-ի, տեսնում է հենց այս հնարավորությունը, վկայում են նրա այն խոսքերը, որ հնչեցին մայիսի 3-ի հայտնի հարցազրույցում. Քոչարյանն այդ ժամանակ ուրախություն էր հայտնում ԲՀԿ-ի հասարակական հեղինակության աճի կապակցությամբ:
Այս տեսանկյունից հետաքրքրական է, թե ինչպես է վերաբերվելու հենց ԲՀԿ-ի այդ ընտրազանգվածը այն հանգամանքին, որ իրեն կարող են դարձնել և, թերևս, արդեն իսկ դարձնում են Ռոբերտ Քոչարյանի «հասարակական հենարան»` թեկուզ առայժմ անուղղակի, բավական նրբորեն քողարկված կամ միջնորդավորված:
Այսինքն` եթե մարդը, ով տրակտորի կամ որևէ այլ բանի դիմաց ձայն է տվել ԲՀԿ-ին կամ ձայն է տվել պարզապես որևէ այլ նկատառումով, անգամ ինչ-որ ծրագրային հմայքով, արդյոք կհամաձայնի՞ նույնն անել, երբ ԲՀԿ-ն հայտարարի Ռոբերտ Քոչարյանի հետ լինելու մասին, կամ երբ Ռոբերտ Քոչարյանը հայտարարի ԲՀԿ-ի հետ լինելու մասին: Մարդիկ ձայն կտա՞ն, կլինե՞ն ԲՀԿ-ի հետ, եթե տեսնեն այնտեղ Ռոբերտ Քոչարյանին:
Մյուս կողմից` խնդիրը լրջանում է նրանով, որ ԲՀԿ-ում Ռոբերտ Քոչարյանին թաքցնելու հարցում հասարակության դեմ ակտիվորեն աշխատում են որոշ ընդդիմադիր ուժեր, մասնավորապես` ի դեմս Հայ ազգային կոնգրեսի, որը հանրությանը փորձում է համոզել, որ ԲՀԿ-ում Ռոբերտ Քոչարյան չկա: Եվ այս պարագայում արդեն Ռոբերտ Քոչարյանի տակ 500 հազարանոց «հենարան» դնելու ԲՀԿ-ական ջանքերը կարծես թե այդքան էլ անհեռանկար չեն թվում: Մյուս կողմից, սակայն, կա նաև խնդրի հակառակ կողմը, և ԲՀԿ-ում Ռոբերտ Քոչարյանին «թաքցնելու» ջանքերը խոշոր հաշվով հասարակության համար ավելի շատ բացահայտում են այդ ջանքերի հեղինակներին:
