Սիրիայի Հալեպ քաղաքում սպասողական վիճակ է: Երեկ Հալեպի միջազգային օդակայանի շրջակայքում բուռն բախումներ են ծավալվել կանոնավոր բանակի և ընդդիմադիրների միջև: Այս մասին «Առաջին լրատվական»-ը տեղեկանում է հալեպահայերի ֆեյսբուքյան էջից:
Ըստ տեղեկատվության` Ջդեյդե թաղամասում ևս մարտեր են վերսկսվել: Հենց այս թաղամասում է գտնվում Հայ առաքելական եկեղեցու առաջնորդարանը և Սուրբ Քառասնից մանկանց Հայ առաքելական եկեղեցին: «Առաջին լրատվական»-ի տեղեկություններով, մարտեր են ընթացել նաև Թլել թաղամասում, որտեղ տեղակայված է Հայ կաթողիկե առաջնորդարանը: Ըստ հալեպահայերի` բախումների հերթական թիրախն է լինելու Նոր Գյուղի ոստիկանատունը:
Հիշեցնենք, որ «Առաջին լրատվական»-ը տեղեկացրել էր, որ շաբաթ օրը Հալեպում տեղական ժամանակով երեկոյան 5-ին, քաղաքի Նոր Գյուղ հայկական թաղամասի Զվարթնոց տաճարի հարևանությամբ երկու ռումբ է ընկել:
Ըստ ստացված նախնական տեղեկությունների, երկու ռումբից մեկն ընկել էր հայ կաթողիկե Զվարթնոց եկեղեցու հետնամասում գտնվող հայկական Ֆարահ դպրոցի վրա, իսկ մյուսը` բնակելի շենքի, հենց եկեղեցու դիմաց:
Ավելի ուշ մեզ հայտնի դարձավ, որ Նոր գյուղում ընկած երկու ռումբերի բեկորից վիրավորված 1981թ. ծնված Ալինա Մխջյանը մահացել է Հալեպի հիվանդանոցներից մեկում:
