«Ալ-Քաիդայի» երկու անդամ դատական հայց են ներկայացրել Մարդու իրավունքների եվրոպական դատարան ընդդեմ բրիտանական իշխանությունների: Այս մասին հայտնել է The Daily Telegraph-ը:
Հայցը ներկայացրած երկու ահաբեկիչները Մեծ Բրիտանիայի քաղաքացիներ են և դատապարտված են ցմահ բանտարկության: Տղամարդիկ պնդում են, որ կտտանքների են ենթարկվել Պակիստանի հատուկ ծառայության կողմից, իսկ բրիտանական MI5 անվտանգության ծառայությունը տեղյակ է եղել պակիստանցի գործընկերների աշխատանքի մեթոդներից:
Ավելի վաղ «Ալ-Քաիդայի» անդամները համանման հայցեր ներկայացրել էին բրիտանական դատարաններ, բայց նրանց բոլոր բողոքները մերժվել են:
Սակայն Մարդու իրավունքների եվրոպական դատարանը որոշում է կայացրել դիտարկել հայցերը: Այժմ բրիտանական իշխանությունները ստիպված կլինեն Ստրասբուրգին բացատրություն տալ ահաբեկիչներին կտտանքների ենթարկելու մեջ MI5-ի ենթադրյալ մասնակցության մասին:
Եթե Մարդու իրավունքների եվրոպական դատարանին չգոհացնեն բրիտանական կողմի բացատրությունները, ապա «ալ-Քաիդայի» անդամների գործով լայնամասշտաբ լսումներ կանցկացվեն: Ամենայն հավանականությամբ, բրիտանական իշխանությունները ստիպված կլինեն վերանայել ահաբեկիչների գործը:
Մի շարք բրիտանացի փաստաբաններ արդեն իրենց զայրույթն են արտահայտել այն կապակցությամբ, որ Ստրասբուրգը միջամտում է երկրի ներքին գործերին: Նրանք անթույլատրելի են համարել, որ Մարդու իրավունքների եվրոպական դատարանը կասկածի տակ առնի Մեծ Բրիտանիայի դատարանների որոշումը:
