Ռուսական ABBYY ընկերությունը աջակցելու է Հայաստանի ազգային վիճակագրական ծառայությանը Հայաստանում իրականացվող նախնական մարդահամարի արդյունքների հաշվարկի ժամանակ:
Ընկերությունն անվճար տրամադրել է ABBYY FlexiCapture ծրագիրը, որը պետք է իրականացնի մարդահամարի արդյունքների մեքենայացված մշակում և տվյալների հավաքագրում: Ավելին, ընկերության կողմից մշակվել է մարդահամարի անցկացման ժամանակ լրացվող հարցաթերթիկը, որը պետք է համապատասխանեցվի ABBYY FlexiCapture ծրագրի աշխատանքների հետ:
Եթե ծրագիրն արդարացնի իրեն, ապա նախնական մարդահամարից հետո ABBYY-ի տրամադրած ծրագրերը կծառայեն նաև բուն մարդահամարի ժամանակ:
Նշենք, որ բուն մարդահամարը կանցկացվի 2011թ. հոկտեմբերի 12-21-ը: Հարցաթերթիկը պարունակում է 33 հիմնական հարց, որոնք ունեն ենթահարցեր: Հարցադրումներն ինչպես անձնական բնույթի են, այնպես էլ ուղղված են տնային տնտեսություններին: Կան նաև հարցադրումներ կոնկրետ տարիքային խմբերի համար: Հարցերը վերաբերում են ծնելիությանը, զբաղվածությանը, բնակչության թվաքանակին, ժամանակավոր բնակվողներին և այլն:
ABBYY ռուսական ընկերությունը հիմնադրվել է 1989թ.-ին Մոսկվայում` Մոսկովյան ֆիզիկական տեխնիկական ինստիտուտի ուսանող Դավիթ Յանի կողմից: Այսօրվա դրությամբ ABBYY-ն ծրագրային ապահովման առաջատար համաշխարհային մշակողներից և փաստաթղթերի հավաքագրման ու բացահայտման, լեզվաբանության ու թարգմանության բնագավառում ծառայությունների մատակարարներից մեկն է: