01:29 Բահրեյնի ուսուցիչների միության ներկայացուցիչները կիրակի օրը հայտարարել են համապետական բողոքի ակցիա անցկացնելու մասին` կոչ անելով ուսուցիչներին այդ օրը մնալ տանը, իսկ ծնողներին` դպրոց չուղարկել իրենց երեխաներին:
23:56 Reuters գործակալության փոխանցմամբ, Բահրեյնի թագավորը հանձնարարել է թագաժառանգ արքայազն Շեյխ Սալման բեն Համադ Ալ-Խալիֆային բանակցություններ սկսել բոլոր կուսակցությունների հետ:
23:50 CNN-ի փոխանցմամբ, ժամեր առաջ Մանամայի կենտրոնում ոստիկանության կրակոցներից մահացել է 3 մարդ, ևս 4-ը գտնվում են ծանր վիճակում:
23:24 ՄԱԿ-ի Մարդու իրավունքների գլխավոր հանձնակատար Նավի Փիլայը հայտարարել է, որ Լիբիայի և Բահրեյնի անվտանգության ծառայությունները անհամաչափ ուժ են կիրառել ցուցարարների դեմ: Նա դատապարտել է Ալժիրում, Բահրեյնում, Իրաքում, Լիբիայում և Եմենում ցուցարարների սպանությունը. «Մերձավոր Արևելքը և Հյուսիսային Աֆրիկան եռում են զայրույթից», նշել է Փիլայը:
23:15 Al-Jazeera-ին Մանամայի Սուլեյմանիա հիվանդանոցից փոխանցած տվյալներով` վիրավորների թիվն այս պահին անցնում է 100-ից: Նրանցից 4 գտնվում են ծայրահեղ ծանր վիճակում:
23:09 Ինչպես հաղորդել է Սպիտակ տան նորանշանակ խոսնակ Ջեյ Քերնին, ԱՄՆ նախագահ Բարաք Օբաման խորը մտահոգություն է հայտնել Բահրեյնում, Լիբիայում և Եմենում տեղի ունեցող իրադարձությունների կապակցությամբ և զսպվածության կոչ է արել այդ երկրների կառավարություններին ցուցարարների հետ հարաբերություններում:
22:10 Al-Jazeera-ի ուղիղի եթերում վիրավորներին օգնություն ցույց տվող բժիշկներից մեկն ասել է, որ այն վայրում, որտեղ ոստիկանությունը բացել է կրակը, կան բազմաթիվ վիրավորներ, որոնց անհնար է բերել հիվանդանոց:
22:07 Al-Jazeera-ն հայտնում է, որ մայրաքաղաք Մանամայի Սուլեյմանիայի շրջանում գտնվող հիվանդանոցում այլևս տեղ չկա, քանի որ այն լցված է վիրավորներով:
Երկրի թագաժառանգ արքայազն Շեյխ Սալման բեն Համադ Ալ-Խալիֆան կոչ է արել հանգստության և երկխոսության, սակայն ցուցարաները հայտարարել են, որ դա այլևս անհնար է:
21:46 Այսօր ոստիկանությունը Բահրեյնի մայրաքաղաք Մանամայի «Մարգարիտի» հրապարակի մերձակայքում հավաքված հազարավոր ցուցարարների վրա կրակ է բացել հրազենից: Հայտնի է մի քանի տասնյակ վիրավորների մասին: Այս մասին հաղորդում է Associated Press գործակալությունը:
Al-Jazeera-ն հայտնում է, որ ցուցարարները դուրս էին եկել համերաշխություն հայտնելու բոլոր այն բժիշկներին, որոնք օգնել են իրենց վիրավորներին: Այն ժամանակ, երբ նրանք ուղղվել են դեպի կենտրոնական հրապարակ, որպեսզի ոստիկաններին և զինվորականներին ծաղիկներ հանձնեն, որպես բարի կամքի նշան, նրանց վրա կրակ է բացվել:
Մի քանի օր առաջ զինվորականությանը հաջողվել էր մասամբ ազատել «Մարգարիտի» հրապարակը ցուցարարներից, սակայն նույնիսկ մայրաքաղաք մտցված զրահատեխնիկան և բազմաթիվ զինվորները չեն կարողացել ստիպել ցուցարարներին նահանջելու:
Այս պահին հայտնի է, որ վերջին օրերին զոհվածների թիվը հասել է 5-ի, մի քանի տասնյակ մարդ վիրավորվել է:
