Այսօր Կահիրեի Թահրիր հրապարակը կրկին լեփ-լեցուն էր: Ինչպես առավոտյան տեղեկացրել էինք, ժողովրդավարական ուժերը որոշել էին այսօր նշել Եգիպտոսի նախկին նախագահ Հոսնի Մուբարաքի հրաժարականի մեկ շաբաթը, ինչպես նաև հերթական անգամ վերահաստատել, որ պարտավոր են հետամուտ լինել, որպեսզի հեղափոխության ժամանակ ներկայացված բոլոր պահանջներն ի կատար ածվեն:
Հրապարակում ելույթ է ունեցել իսլամական աշխարհում հայտնի աստվածաբան Յուսուֆ Ալ-Քադրաուին, որը կոչ է արել արաբական երկրների առաջնորդներին երկխոսություն սկսել սեփական ժողովրդի հետ. «Ես կոչ եմ անում արաբ առաջնորդներին հրաժարվել իրենց ավանդական հռետորաբանությունից և սկսել իրական կառուցողական երկխոսություն ժողովրդի հետ»:
Ալ-Քադրաուին նաև կոչ է արել պաշտոնանկ անել ներկայիս վարչապետ Ահմետ Ալ-Շաֆիկին, քանի որ այդ կառավարությունը ձևավորվել է դեռ Մուբարաքի օրոք և ներկայացնում է նրա վարչակազմը: Հրապարակում նաև հնչել են կոչեր` պատժելու կոռումպացված նախկին իշխանավորներին, վերացնել մի քանի տասնամյակ գործող արտակարգ դրությունը և ազատ արձակել բոլոր նրանց, ովքեր ոստիկանության կողմից ձերբակալվել են Թահրիրում տեղի ունեցած բողոքի ակցիաների ժամանակ: Այս մասին հաղորդում է РИА-Новости գործակալությունը:
