«Օրանժ Արմենիա» ընկերության Վանաձորի մասնաճյուղի տնօրեն Տարոն Ապրեսյանը մտադիր է իր թեկնածությունն առաջադրել Վանաձորում սեպտեմբերին կայանալիք քաղաքապետի ընտրություններում:
Որոշումը, սակայն, ինչպես «Առաջին լրատվական»-ի թղթակցի հետ զրույցում փոխանցեց նա, վերջնական չէ, և 2 օրից պարզ կլինի` Տարոն Ապրեսյանը կառաջադրվի, թե ոչ. «Ես մտադրություն ունեմ քաղաքապետ դառնալու, բայց ևս 2 օր, ու ես հայտարարություն կտարածեմ թեկնածությունս դնելու կամ չդնելու մասին»,- ասաց նա:
Հարցին, թե «Օրանժ Արմենիա» ընկերությունն ինչքանով կօգնի իրեն քարոզարշավի ընթացքում, Տարոն Ապրեսյանը պատասխանեց. «Ես արդեն Օրանժի հետ կապ չունեմ, ինքս իմ ձեռքով հրաժարականի դիմում եմ ներկայացրել, որպեսզի թեկնածությունս առաջադրելու դեպքում բավարար ժամանակ ունենամ ու կարողանամ նորմալ զբաղվել քարոզչությամբ: Արդեն «Օրանժ Արմենիա»-ի Վանաձորի մասնաճյուղը նոր տնօրեն ունի»:
Տարոն Ապրեսյանն ասաց նաև, որ շրջանառվող հավանական թեկնածուներից ոչ մեկին չի թերագնահատում: Իսկ հարցին, թե որպես Վանաձորի բնակիչ, ինչպես է գնահատում գործող քաղաքապետ Սամվել Դարբինյանի աշխատանքը, վերջինս նշեց, որ գործող քաղաքապետի արած-չարածը կապ չունի, իր մրցակցությունը ոչ թե կոնկրետ անձի հետ է լինելու, այլ «իր Վանաձորի» համար է ինքը փորձելու աշխատել:
Հավելենք, որ որևէ քաղաքական ուժ ու կուսակցություն դեռևս Տարոն Ապրեսյանին աջակցելու ցանկություն չի հայտնել, բայց 2 հզոր ուժերը` ՀՀԿ-ն ու ԲՀԿ-ն արդեն ունեն իրենց վերջնական թեկնածուներն առաջիկա ընտրություններում: Այս դիտարկմանն ի պատասխան, Տարոն Ապրեսյանը նշեց, որ իրեն ամենևին չի վախեցնում 2 հզոր կուսակցությունների ընտրյալների հետ պայքարելը. «Եթե ես վերջնական որոշում կայացնեմ առաջադրվելու, աշխատելու եմ միայն նրա համար, որ ինձ սատարի իմ քաղաքացին:
Ավելացնենք նաև, որ Տարոն Ապրեսյանն այժմ «Ապագա Վանաձոր» ակումբի կազմակերպիչներից մեկն է, և հենց ակումբն էլ զբաղվում է նախընտրական բոլոր հարցերով:
Շուշաննա Գրիգորյան, «Առաջին լրատվական»-ի Լոռու մարզային թղթակից
