Պատմական հուշարձաններն աղտոտված են այնքան, որքան այցելու ունեն: Այս մասին այսօր լրագրողների հետ հանդիպման ժամանակ ասաց հուշարձանագետ Սամվել Կարապետյանը` խոսելով Հայաստանի պատմական և բնական հուշարձանների աղտոտվածության և հուշարձանները պահպանելու հայի մշակույթի բացակայության շուրջ:
Ըստ նրա` զբոսաշրջիկները չէ, որ մեր հուշարձաններն աղտոտում են, հուշարձաններն աղտոտում ենք հենց մենք: «Տեսնելով մեր հուշարձանների աղտոտվածությունը` եվրոպացիները հասկանում են, որ հայն առանձնապես բարձր որակ ունեցող ժողովուրդ չի, զարմանում են: Մեր կեցվածքը վարձով ապրողի կեցվածք է»,- նկատեց Սամվել Կարապետյանը:
Համատեղ ասուլիսի ընթացքում Տուրիզմի հայկական ինստիտուտի տնօրեն Ռոբերտ Մինասյանն ասաց, որ Հայաստանը ստեղծված է տուրիզմի համար: «Բայց չի լինում չէ՞, որ քո տուն հյուր գա, և դու չպատրաստվես, չմաքրես քո տունը, հուշարձանների դեպքում ևս, մենք պետք է պատրաստվենք, խնամենք, կարգուկանոնի բերենք: Մեր երկիրը տուրիզմը հռչակել է որպես գերակա ուղղություն, սակայն ոչինչ չենք անում»,- իր տեսակետը ներկայացրեց Ռոբերտ Մինասյանը՝ շարունակելով, որ դաստիարակությունը պետք է սկսել երիտասարդ սերնդից: Ըստ նրա` պետք է կոնկրետ խնդիրներ դրվեն:
«Միացյալ Հայաստան» խմբի հիմնադիր Արշակ Զաքարյանը, ով ամեն օր տարբեր տուրիստական խմբեր է բերում պատմական հուշարձանների տարածք, ներկայացնում Հայաստանը, տեղեկացրեց, որ 1994 թվականին մի չինացի աղջիկ Հայաստանի պատմական հուշարձաններից մեկում որտեղ աղբ էր տեսնում՝ հավաքում էր: Նա տեղեկացրեց, որ զբոսաշրջիկները զարմանում են հուշարձանների աղտոտվածությունից: «Հավուց Թառի ջրհորի մոտ հայերը լցնում են իրենց աղբը: Անգլիացիներ էինք տարել, ջրից օգտվել և թունավորվել էին: Օրինակ` Տաթևի մուտքի մոտ աղբամանները դրված են 15 մետր այն կողմ, բայց մարդիկ մի քանի քայլ չեն գնում աղբը թափելու: Պատասխանատուները տեղացիներն են, ովքեր սկսել են մաքրել, բայց Գառնիի դարպասից ներս աղբ չես գտնի, բոլորն այդպես պետք է լինեն»,- նշեց Արշակ Զաքարյանը` հավելելով, որ պետք է տուգանքներ նշանակվեն շրջակայքն աղտոտելու համար:
