Թուրքական Haberler.com կայքի փոխանցմամբ՝ իշխող «Արդարություն ու զարգացում» կուսակցությունը (ԱԶԿ) Սահմանադրության համաձայնեցման հանձնաժողովին առաջարկել է նվազեցնել խորհրդարան մուտք գործելու համար սահմանված 10 տոկոսանոց ընտրական բարձր շեմը:
Դա ԵՄ-ին Թուրքիայի անդամակցելու ճանապարհին առկա գլխավոր խոչընդոտներից մեկն է, քանի որ Թուրքիայում գործող ընտրական 10 տոկոսանոց շեմն ամենաբարձրն է եվրոպական երկրներում: Թուրքիայից հետո այդ առումով երկրորդը Ռուսաստանն է՝ 7 տոկոս:
Գերմանիայում, Բելգիայում, Էստոնիայում, Վրաստանում, Հունգարիայում, Մոլդովայում, Լեհաստանում, Չեխիայում ու Սլովակիայում գործում է 5 տոկոսանոց շեմ, Ավստրիայում, Բուլղարիայում, Իտալիայում, Նորվեգիայում, Սլովենիայում, Շվեդիայում՝ 4 տոկոսանոց շեմ, Իսպանիայում, Հունաստանում, Ռումինիայում, Ուկրաինայում՝ 3 տոկոսանոց շեմ, Դանիայում՝ 2 տոկոսանոց շեմ, Նիդեռլանդներում՝ 0.67 տոկոսանոց շեմ:
Հիշեցնենք, որ Թուրքիայում գործող 10 տոկոսանոց շեմը լուրջ խոչընդոտ է հանդիսանում երկրի խորհրդարանում քրդական ներկայության ապահովման համար: 2002 թվականի խորհրդարանական ընտրություններում քրդական «Դեմոկրատական ժողովուրդ» կուսակցությունը հավաքեց քվեների 6.21 տոկոսը (1,960,660 քվե), ինչը բնականաբար բավարար չեղավ խորհրդարան մուտք գործելու համար:
Սակայն արդեն հաջորդ՝ 2007 թվականի խորհրդարանական ընտրություններում քրդերը փոխեցին իրենց մարտավարությունը, և միացյալ կուսակցությամբ հանդես գալու փոխարեն, նրանք երկրի արևելյան ու հարավարևելյան շրջաններում, ուր գլխավորապես ապրում են քրդեր, հանդես եկան առանձին թեկնածուներով (մեծամասնական կարգով) և լուրջ հաջողություններ գրանցեցին, ինչը նույն եղանակով էլ ավելի զարգացրին 2011 թվականի խորհրդարանական ընտրություններում:
