Նորվեգացի ահաբեկիչ Անդերս Բրեյվիկի հայրը պատրաստվում է գիրք գրել որդու մասին: Այս մասին հաղորդում է RIA Novosti-ն՝ վկայակոչելով «Դագբլադետ» պարբերականը:
Այս տեղեկությունը լրագրողներին հաստատել է ինքը՝ Յենս Բրեյվիկը, սակայն հրաժարվել է հայտնել մանրամասները: «Դա ճիշտ է, բայց ես չեմ ցանկանում մեկնաբանել»,- ասել է նա:
Նորվեգացի լրագրողները կապվել են երկրի խոշորագույն հրատարակիչների հետ՝ փորձելով պարզել՝ արդյոք իրենց առաջարկ արվել է գրքի հրատարակման վերաբերյալ: Հրատարակիչներն առայժմ նման առաջարկ չեն ստացել, սակայն նշել են, որ շատ հետաքրքրված են նման գիրք հրատարակելու հարցում:
Aschehoug և Gyldendals հրատաարակչությունների ղեկավարները հայտարարել են, որ պատրաստվում են բանակցություններ սկսել Բրեյվիկ-ավագի հետ:
«Շատ հետտաքրքիր է իմանալ՝ դա ինչ ձեռագիր է, մենք կարող էինք հարցը լուծել սովորական կարգով»,- ասել է Aschehoug-ի խմբագիր քարի Սպելդնեսը:
Նախկին դիվանագետ Յենս Բրեյվիկն այժմ ապրում է իր կնոջ հետ Ֆրանսիայի հարավում: Ահաբեկչությունից հետո առաջին օրերին նա հրաժարվում էր շփվել լրագրողների հետ՝ դատապարտելով որդու արարքը: Սակայն անցյալ տարվա վերջին նա համաձայնեց հարցազրույց տալ նորվեգական NRK հեռուստաալիքին՝ խոստովանելով, որ խղճի խայթ է զգում:
Հիշեցնենք, որ 2011թ. հուլիսի 22-ին Օսլոյի կառավարության շենքի մոտ և Ուտոյա կղզում Բրեյվիկի իրականացրած գործողությունների հետևանքով զոհվել է 77 մարդ:
Բրեյվիկի դատավճիռը կկայացվի օգոստոսի 24-ին:
