Օգոստոսի 24-ին Կենտրոն և Նորք-Մարաշ վարչական շրջանների ընդհանուր իրավասության դատարանում կշարունակվի Աշտարակ քաղաքի բնակիչ Նունե Մաղաքյանի հայցով հերթական դատավարությունը, որն արդեն մտնում է դատաքննական փուլ: Այս մասին ‹‹Առաջին լրատվական››-ին ասաց Նունե Մաղաքյանի փաստաբան Տիգրան Աթանեսյանը:
‹‹Մոր և մանկան առողջության պահպանման›› ՓԲԸ -ում կատարած վիրահատության արդյունքում իր պնդմամբ հաշմանդամ դարձած Նունե Մաղաքյանի գործով նախնական դատավարությունը մեկնարկել է դեռ մի քանի ամիս առաջ:
Աշտարակ քաղաքի բնակչուհին դատարանում հայտնել է, որ երկու ամսում հինգ անգամ ենթարկվել է վիրահատության, իսկ վերջում հեռացրել էին նրա երիկամը և փոխպատվաստել իբրև միզուղի: Երիտասարդ կնոջ փաստաբանի խոսքով` վիրահատության ժամանակ պրոֆեսոր Գեորգի Օկոևը` չիմանալով, թե ինչ վիճակ է, առանց կնոջը և անգամ նրա հարազատներին նախապես տեղյակ պահելու, հեռացրել է Նունե Մաղաքյանի արգանդը` իր հավելումներով:
Այնուհետ պարզվել է, որ վիրահատելուց հետո կարել են հիվանդի միզածորանը, իսկ դրանից երեք-չորս օր հետո հայտնաբերել են, որ հիվանդի վիճակը ծանրացել է և իրենց հնարավորություններից դուրս է նրան օգնելը: Մարգարյան ծննդատնից կնոջը տեղափոխել են ‹‹Արմենիա›› բժշկական կենտրոն, որտեղ նրան չեն կարողացել բուժել, իսկ այնուհետև տեղափոխել են ‹‹Նաիրի›› ԲԿ, որտեղ նա ենթարկվել է ևս երեք վիրահատության:
Կենտրոն և Նորք-Մարաշ վարչական շրջանների ընդհանուր իրավասության դատարանում դատական նիստերը նախագահում է դատավոր Գագիկ Խանդանյանը:
Նունե Մաղաքյանի փաստաբան Տիգրան Աթանեսյանը ‹‹Առաջին լրատվական››-ի հետ զրույցում նշեց, որ այս պահին գործում կան փորձագիտական 3 եզրակացություններ, որոնցից 2-ն այլ բանի մասին են վկայում, 1-ը` լրիվ այլ:
Բանն այն է, որ Նունե Մաղաքյանի առողջական վիճակի հետ կապվածʽ կա գերմանական ընկերության փորձագիտական եզրակացություն, որը, փաստաբանի խոսքով, փաստացի ապացուցում է, որ բժիշկ Օկոևը սխալ բուժում է իրականացրել: Սակայն գործում կան նաև տեղական 2 ընկերությունների դատաբժշկական եզրակացություններ, որոնք արդեն բացառում են բժշկի կողմից կատարված սխալի հավանականությունը: Փաստաբանը կասկած չունի, որ դատարանը հենց հայկական ընկերությունների փորձաքննության արդյունքներով էլ կառաջնորդվի, սակայն պնդում է, որ իրենք անցնելու են դատական բոլոր ատյաններով և պահանջելու են երիտասարդ կնոջ առողջությանը պատճառված վնասի փոխհատուցում:
Նշենք, որ երիտասարդ կինը և նրա ամուսինը այն կարծիքի են, որ բժշկական կենտրոնում Նունե Մաղաքյանի օրգանիզմում փորձեր են կատարվել` փոփոխելով միզածորանի դիրքը, իսկ արված մյուս բոլոր վիրահատությունների նպատակը եղել է կնոջ երիկամի սեփականաշնորհումը, ինչը հեռացնելուց հետո այն հարազատներին ցույց չեն տվել։
