Էրբիլում շատ կարևոր հանդիպում է տեղի ունեցել, գրում է թուրքական «Yeni Safak»-ը: Դրա կազմակերպիչը Իրաքում Քուրդիստանի տարածաշրջանային կառավարության նախագահ Մեսուդ Բարզանին էր, իսկ մասնակիցները՝ երկու դաշինքներ՝ Քրդական ազգային խորհուրդն ու «Դեմոկրատական միություն» կուսակցությունը, որոնք սիրիացի քրդերի հիմնական ռազմաքաղաքական ուժերն են: Հանդիպման գլխավոր հարցը համատեղ նախագծի շրջանակներում երկու դաշինքների միավորումն էր: Սիրիացի քրդերի միավորումը և Մեսուդ Բարզանիի զգալի ներդրումը Թուրքիային և տարածաշրջանային մյուս դերակատարներին կարող են մտահոգել:
Ինչո՞ւ չեն կարողանում համաձայնության գալ Սիրիայի ազգային խորհուրդն (ՍԱԽ) ու Քրդական ազգային խորհուրդը
Քրդական ազգային խորհուրդը ձգտում է գործել ժողովրդավարական իրավունքների և կանոնների շրջանակում և մերժում է ռազմական միջնորդությունը: ՍԱԽ-ի հետ հակասությունների հիմնական պատճառն այն է, որ վերջինս չի ընդունում հետասադական Սիրիայում քրդերին քաղաքական-վարչական ինքնավարություն տրամադրելու պահանջը:
Բարզանիի մեծ խաղը
Մեսուդ Բարզանիի ղեկավարությամբ կայացած հանդիպման ժամանակ պայմանավորվածություններ են ձեռք բերվել Քրդական ազգային խորհրդի և «Դեմոկրատական միություն» կուսակցության միջև, ինչպես նաև ստեղծվել է «Քրդական բարձրագույն խորհուրդ», որը սիրիացի քրդերին կներկայացնի ինչպես ազգային, այնպես էլ միջազգային մակարդակով:
Անկասկած, ինչպես Բարզանին՝ Քրդական ազգային խորհրդի, այնպես էլ Քուրդիստանի Աշխատավորական կուսակցությունը՝ «Դեմոկրատական միություն» կուսակցության միջոցով, ջանքեր են գործադրելու, որպեսզի այդ կառույցը վերցնեն իրենց վերահսկողության տակ, ինչի հետևանքով էլ լուրջ պայքար է ծավալվելու: Այդ ժամանակ Թուրքիայի նախապատվությունները կապված կլինեն տարածաշրջանի՝ Քրդական ազգային խորհրդի և Մեսուդ Բարզանիի վերահսկողության տակ գտնվելու փաստի հետ, որի հետ համագործակցում է Թուրքիան: Չէ՞ որ Ասադից հետո վերահսկողությունը «Դեմոկրատական միություն» կուսակցության ձեռքն անցնելը նշանակում է Թուրքիայի անվտանգության հերթական սպառնալիք Սիրիայի հյուսիսից: Իրականում Թուրքիան ցանկանում է, որ այդ կուսակցությունը մեկուսանա քաղաքական համագործակցության գործընթացից, կորցնի լեգիտիմությունն ու չընդունվի ժողովրդի կողմից:
Անվտանգության վերաբերյալ Թուրքիայի անհանգստությունը
Սիրիայի հյուսիսը վերահսկող քրդերը պատրաստ են Հյուսիսային Սիրիայում ինքնավար տարածաշրջան ստեղծել, որի նմանօրինակն արդեն իսկ գոյություն ունի Հյուսիսային Իրաքում: Սիրիացի քրդերը Էրբիլում տեղի ունեցած հանդիպման ժամանակ ընդհանուր համաձայնության գալով՝ ձգտում են Հյուսիսային Իրաքում Քուրդիստանի տարածաշրջանային կառավարության նմանությամբ կառույց ստեղծել՝ դիմելով Սիրիայում Քուրդիստանի Աշխատավորական կուսակցության ճյուղը հանդիսացող «Դեմոկրատական միություն» կուսակցության ռազմական ուժին:
Իհարկե, նման իրավիճակը Թուրքիային լուրջ անհանգստություն է պատճառում: Հյուսիսային Սիրիայում քրդական տարածաշրջանի ձևավորումը միաժամանակ բարձրացնում է Թուրքիայի հարավային սահմաններին անկախ Քուրդիստանի ձևավորման ռիսկը:
