ՀԱԿ կազմում գտնվող «Ժողովրդի իշխանություն» հասարակական-քաղաքական նախաձեռնությունն առաջիկա նախագահական ընտրություններում ընդդիմության միասնական թեկնածու է համարում առաջին նախագահ Լևոն Տեր-Պետրոսյանին:
«Բացի Լևոն Տեր-Պետրոսյանից՝ ով ուզում է լինի, որ դաշտից ուզում է լինի, մեզ համար անընդունելի է»,- «Առաջին լրատվական»-ին ասաց «Ժողովրդի իշխանություն» հասարակական-քաղաքական նախաձեռնության անդամ Մովսես Արիստակեսյանը:
Նրա խոսքով՝ կոնգրեսը 2008 թվականի ապօրինի ընտրություններից հետո հավաքվել է Լևոն Տեր-Պետրոսյանի շուրջը: «Եթե մենք դա պետք է թողնենք ու ուրիշի ծառայենք, մենք դրան պատրաստ չենք»,- ասաց նա:
Հարցին, եթե Լևոն Տեր-Պետրոսյանը չլինի միասնական թեկնածու, «Ժողովրդի իշխանություն» հասարակական-քաղաքական նախաձեռնությունն արդյոք դուրս կգա՞ ՀԱԿ-ից, Մովսես Արիստակեսյանը պատասխանեց. «Մեր թիմը դեռ որոշում չի կայացրել: Ես նորից եմ ասում՝ մեր միասնական թեկնածուն Լևոն տեր-Պետրոսյանն է: Եթե նա չլինի թեկնածուն, այնժամ էլ մենք որոշում կկայացնենք»,- ասաց նա:
Մեր այն դիտարկմանը, որ վերջին ժամանակահատվածում Կոնգրեսի առաջնորդի քաղաքակնությունն ուղղված է դեպի «Բարգավաճ Հայաստան» կուսակցությունը, Մովսես Արիստակեսյանը պատասխանեց, որ իրենց խոսակցությունների վրա չեն հիմնվում, այլ առկա իրողություններն են հաշվի առնում: Միաժամանակ նա նշեց, որ իրենց համար անընդունելի է և «Բարգավաճ Հայաստան»-ը, և Ռոբերտ Քոչարյանը:
Մովսես Արիստակեսյանը հավելեց, որ կասկածելի չէ այն հանգամանքը, որ ՀԱԿ-ի ղեկավարությունը չի պատասխանում ՀԱԿ-ը լքած Դավիթ Շահնազարյանի հնչեցրած մեղադրանքներին:
