ԱՄՆ-ում երեքշաբթի օրը 87 տարեկանում կյանքից հեռացել է գրող Գոր Վիդալը: Այս մասին հաղորդում է Associated Press-ը՝ վկայակոչելով գրողի երղբորորդի Բյոր Սթիրսին: Նրա խոսքերով՝ Վիդալը մահացել է իր տանը՝ Հոլիվուդի բլուրներում՝ թոքերի բորբոքումից առաջացած բարդությունից:
Գոր Վիդալը համարվում է 20-ր դարի ամերիկյան գրականության դասականներից մեկը՝ Նորման Մալերի և Թրումեն Կապոտեի կողքին: Նա հռչակ է ձեռք բերել իր էսսեներով, նամակներով, սցենարներով, վեպերով,որոնց շարքում առավել հայտնի են «Լինկոլն», «Քաղաքը և սյունը», «Մայրա Բրեկինրիջ» ստեղծագործությունները:
Վիդալն ամերիկյան գրականության մեջ առաջիններից էր, ով բարձրացրել է համասեռամոլության թեման: Ինքը՝ գրողը, չէր թաքցնում իր կապը տղամարդկանց հետ: Նա երբեք ամուսնացած չի եղել և 53 տարի ապրել է Հովարդ Օսթենի հետ:
Վիդալի գրական պարգևների շարքում կարելի է առանձնացնել Ազգային գրքի մրցանակը, որը նա ստացել է 1993թ. «Միացյալ Նահանգներ (1952-1992)» էսսեի համար: 2009թ. նա դարձել է Ամերիկյան հումանիստական ասոցիացիայի պատվավոր նախագահ: Մինչ նա այդ պաշտոնը զբաղեցնում էր Քուրթ Վոնեգուտը, որը մահացավ 2007թ:
Գոր ՎԻդալը հայտնի էր նաև հասարակական- քաղաքական թեմաների իր մեկնաբանություններով: Մասնավորապես, նա եղել է ամերիկյան արտաքին քաղաքականության հետևողական քննադատը: Սեպտեմբերի 11-ի ահաբեկչությունից հետո նա պնդում էր, որ դրա խորը պատճառը հենց ԱՄՆ-ի կայսերական քաղաքականությունն է այլ երկրների նկատմամբ: Արդյունքում, նա մասնակցել է Իրաքում պատերազմի դեմ ցույցներին:
