Տեխնոլոգիաների աննախադեպ աճով և միաժամանակ գաղափարական խոր ճգնաժամով պայմանավորվածʽ աշխարհում տեղի ունեցող գլոբալ փոփոխություններն իրենց ազդեցությունն են թողնում բոլոր սուբյետների վրա՝ մշակույթների, սոցիալական համակարգերի, ազգերի, պետությունների և այլ կազմավորումների: Այդ ազդեցություններից մեկուսացված չէ Հայաստանը, որը, գտնվելով քաղաքակրթական տարբեր նախագծերի, մշակույթների, սոցիալական կառուցվածքների խաչմերուկում, համապատասխան ադապտացիոն մեխանիզմներով փորձում է հարմարվել կամ էլ հակադրվել այդ գործընթացներին:
Ինչպիսի՞ ճանապարհով պետք է ընթանար Հայաստանը վերջին 20 տարիների ընթացքում: Արդյո՞ք գլոբալ ու ետսովետական խնդիրներով է պայմանավորված ներկա արժեհամակարգային ճգնաժամը: Արդյո՞ք անհետ կորել է 1988 թվականի համազգային վերելքը, վերե՞լք էր դա արդյոք, ու ի՞նչ է պակասում մեզ այսօր աշխարհի լիարժեք մասնիկը դառնալու, քաղաքակրթական հակոտնյա նախագծերի մեջ հաջող կերպով կողմնորոշվելու, դեպի նորարարական գաղափարները դառնալու ու Հայաստանի զարգացումն ապահովելու համար: Արդյոք վերաիմաստավորեցի՞նք մենք Հայաստանի անկախացման գործընթացն ու զարգացման վերջին քսան տարին:
Այս հարցերին պատասխաններ ստանալու նպատակով, ՍՄԻԼ հիմնադրամը հայտարարում է ստեղծագործական պատմվածքի մրցույթ՝ «1988» խորագրով:
Պատմվածքի ծավալը պետք է լինի 10000 բառի սահմաններում, շրիֆտը սիլֆայեն 14 տառաչափով, էջերը համարակալված, հեղինակի անունն ու կոնտակտային տվյալները՝ վերնագրից առաջ: Նկարների և նկարազարդումների, ինչպես նաև ավելի բարդ մուլտիմեդիաների օգտագործում որպես պատմվածքի մաս թույլատրելի է, եթե բխում է պատմվածքի մտահղացումից:
Մրցույթի հաղթողները կստանան դրամական պարգև` 1-ին տեղի համար 500 ԱՄՆ դոլարին համարժեք, 2-րդ տեղի համար` 400 ԱՄՆ դոլարին համարժեք և 3-րդ տեղի համարʽ 300 ԱՄՆ դոլարին համարժեք: Մրցույթի հաղթողներին որոշելու է անկախ հանձնաժողովը, որը բաղկացած է լինելու ճանաչված գրականագետներից, հրապարակախոսներից ու մտավորականներից: Մրցույթի հաղթողները որոշվելու են պատմվածքների ստեղծագործական որակների հիման վրա: Պատմվածքների հանձման վերջնաժամկետը 2012թ. հոկտեմբերի 1-ն է:
Հաղթած պատմվածքները կհրապարակվեն, կթարգմանվեն անգլերեն և ռուսերեն, կտարածվեն ՍՄԻԼ Հիմնադրամի միջոցառումների ժամանակ, ինչպես նաև կընդգրկվեն հնարավոր այլ գործածումներում (ֆիլմի սցենար և այլն): ՍՄԻԼ հիմնադրամն իրավունք է վերապահում հրապարակել նաև չհաղթած պատմվածքները՝ իր հայեցողությամբ և հեղինակի համաձայնությամբ:
Պատմվածքները պիտի լինեն նախապես չհրապարակված, ներառյալʽ էլեկտրոնային հրապարակումը: Պատմվածքին կից պիտի ներկայացվեն հեղինակի տվյալները: Հեղինակն իրավունք ունի հանդես գալ կեղծանունով, եթե իր հետ կապի հնարավորությունը պահպանվում է:
Մրցույթին ներկայացված պատմվածքներն անմիջապես կտեղադրվեն ՍՄԻԼ հիմնադրամի կայքէջում, ընթերցողների գնահատականն ու մեկնաբանությունները ստանալու համար:
Պատմվածքները պետք է ուղարկվեն էլեկտրոնային փոստով` [email protected] հասցեով: Հարցերի ու պարզաբանումների համար կարող եք զանգահարել Հովհաննես Հովհաննիսյանին` 010209963 հեռախոսահամարով:
