Սիրիայի զորքերը Թուրքիայի հետ սահմանին գծով դիպուկահարներ են տեղակայել, որոնց խնդիրն է կանխել սիրիացի փախստականների մուտքը Թուրքիա: Այս մասին գրում է թուրքական Radikal թերթը:
Դիպուկահարները փախստականների տեղաշարժը վերահսկում են Թուրքիայի սահմանակից Հաթայ մարզում: Փախստականների նկատմամբ զենքի կիրառման դեպքեր դեռևս չեն գրանցվել, սակայն թուրքական սահմանից դիպուկահարներին կարելի է տեսնել անզեն աչքով: Նրանք տեղակայված են տարբեր շինությունների տանիքներին:
Չնայած սահմանի վրա իրականացվող հսկողությանը՝ սիրիացիները նախկինի պես տեղափոխվում են Թուրքիա: Թուրքիայի իշխանությունների տվյալներով՝ այս պահին այնտեղ ժամանակավորապես ապրում է ավելի քան 44 հազար սիրիացի: Նրանք տեղակայված են 4 ճամբարներում: Ընդհանուր առմամբ, անցյալ տարվա գարնանից Թուրքիան ընդունել է Սիրայի 72 հազար քաղաքացիների, որոնցից 27 հազարը վերադարձել են հայրենիք:
