Ներկա դրությամբ դեպի Լիբանան սիրիահայերի հոսք չի նկատվում: «Առաջին լրատվական»-ի հետ զրույցում այս մասին տեղեկացրեց լիբանանահայ գրող, հրապարակախոս Սագո Արեանը:
«Լիբանանահայությունն ու սիրիահայությունն իրար հետ սերտ կապեր ունեն, այնպես որ, սիրիահայերի վիճակն այսօր լիբանանահայերի մտահոգության առանցքն է՝ հատկապես Հալեպում առկա իրադրության ֆոնին: Մեր բոլորի հայացքներն ուղղված են դեպի Սիրիա»,- ասաց նա՝ միաժամանակ հավելելով, որ Մեծի Տանն Կիլիկիո կաթողիկոս Ն.Ս.Օ.Տ.Տ. Արամ Ա. Վեհափառը հատուկ կոչ է արել բարոյական աջակցություն ցուցաբերել սիրիահայությանը:
Սագո Արեանը, միաժամանակ, տարակուսանք հայտնեց, որ լիբանանահայ գաղութում սիրիահայերին օգնության ձեռք մեկնելու ուղղությամբ տակավին ոչ մի քայլ չի ձեռնարկվել, ոչ մի կազմակերպություն չի հիմնվել: «Սա շատ զարմանալի է, բայց չկա մեկը, ում կոնկրետ կարելի է մեղադրել անգործության մեջ»,- նշեց լիբանանահայ գործիչը:
Նա դժվարացավ միանշանակ պատասխան տալ՝ դեպի Լիբանան սիրիահայերի հնարավոր հոսքի դեպքում այդ երկիրը կարո՞ղ է վերջիններիս համար մշտական ապաստան ծառայել, թե սիրիահայերը կգերադասեն հեռանալ նաև Լիբանանից:
