Սիրիացի ապստամբները կառավարական զորքերի հետ ընդհարման ժամանակ ուրբաթ գերի են վերցրել 150 զինծառայողների:
France Presse-ի տեղեկացմամբ` այս է վկայում, այսպես կոչված, Ազատ սիրիական բանակի տարածած տեսաերիզը:
Տեսաերիզում երևում են հյուսիսային Ալեպո նահանգում գերի վերցված մոտ հարյուր զինծառայողներ:
«Այսպիսին է այս վարչակարգի կողմնակիցների ճակատագիրը»,- հայտարարում է կադրից դուրս հնչող ձայնը:
Հայտնի է, որ մոտ 50 զինծառայողներ, որոնցից 14- սպաներ են, գերի են վերցվել Սիրիայի հյուսիս-արևմտյան Իդլիբ նահանգում:
Հիշեցնենք` այսօր ավելի վաղ հայտնի է դարձել, որ բախումների հետևանքով Սիրիայի տարբեր նահանգներում ուրբաթ 40 մարդ է մահացել: Մասնավորապես, մարտերի զոհ է դարձել նաև սիրիական բանակի 9 զինվոր:
Մեկ տարի է` Սիրիայի կառավարության և ընդդիմության միջև հակասությունները շարունակվում են, ապստամբները պահանջում Բաշար Ասադի հրաժարականը: Հակամարտության ընթացքում, տարբեր գնահատականներով, զոհվել է 12-17 հազար մարդ:
