Հուլիսի 27-ին «Զարգացման հայկական գործակալություն» ՓԲԸ, ՀՀ կրթության և գիտության նախարարության Գիտության պետական կոմիտեն, «Տեքնոլոջի Տրանսֆեր Ասոցիացիա» իրավաբանական անձանց միությունը ստորագրել են համագործակցության համաձայնագիր «Գիտական հետազոտությունների արդյունքների առևտրայնացման միջազգային համագործակցության աջակցման նորարարական կենտրոն» ստեղծելու մասին:
Համաձայնագիրը կնքեցին ԶՀԳ գլխավոր տնօրեն պարոն Ռ. Հարությունյանը, Գիտության պետական կոմիտեի նախագահ պարոն Ս. Հարությունյանը, և «Տեքնոլոջի Տրանսֆեր Ասոցիացիա»-ի նախագահ պարոն Մ. Աբովյանը: Կոմիտեի նախագահը ողջունեց այս նախաձեռնությունը և հույս հայտնեց, որ համագործակցության արդյունքում կլինեն գիտություն-տնտեսություն կապի ամրապնդմանն ուղղված բազմաթիվ նորարարական ծրագրեր, որոնք կնպաստեն ՀՀ –ում տնտեսության զարգացմանը, գիտնականների տնտեսական հատվածի ինտեգրմանը, գիտական ծրագրերի առևտրայնացման խնդիրների լուծմանը:
Համաձայնագրի ստորագրմամբ կողմերը պարտավորվում են կենտրոնացնել իրենց հնարավորությունները և ստեղծել կենտրոն, որի նպատակն է նպաստել ՀՀ-ում նորարարական գործունեությանը, առևտրայնացման ներուժ ունեցող գիտատեխնիկական մշակումների իրականացմանը, գիտական հետազոտությունների արդյունքների առևտրայնացմանը, նոր տեխնոլոգիաների ստեղծմանն ու կիրառմանը, գիտություն-տնտեսություն կապի ամրապնդմանը և ոլորտում պետություն-մասնավոր հատված համագործակցության զարգացմանը:
Համաձայնագրի համաձայն Գիտության պետական կոմիտեն պարտավորվում է աջակցել գիտական արդյունքների առևտրայնացմանը, տնտեսության մեջ ներդրմանը, խթանել ՀՀ գիտական կազմակերպությունների, գիտական աշխատողների խմբերի և գիտական աշխատողների կողմից կիրառական արդյունքի ձեռքբերմանն ուղղված նորարարական ծրագրերը:
Համաձայնագրի մյուս կողմերը պարտավորվում են կազմակերպել կենտրոնին ներկայացված ծրագրերի փորձաքննությունների ընդհանուր գործընթացը, ծրագրերի տեխնիկական իրագործելիության փորձաքննությունը, հայկական նորարարական տեխնոլոգիաների հանդեպ հետաքրքրություն ցուցաբերող օտարերկրյա կազմակերպությունների համար գործնական այցեր և տեղական համապատասխան կազմակերպությունների հետ հանդիպումներ, տեղեկատվություն տրամադրել գործարար շրջանակներին առկա տեխնոլոգիաների, տեխնոլոգիական լուծումների, նորարարական առաջարկների և բիզնես նախագծերի մասին, խորհրդատվություն տրամադրել մտավոր սեփականության, գիտատեխնիկական մշակումների արտոնագրման և այլ իրավական հարցերի վերաբերյալ:
