Այժմ Վաշինգտոնը կենտրոնացրել է իր ուժերը Սիրիայում Ասադի հեռանալուց հետո կյանքի բնականոն ռիթմն ապահովելու ուղղությամբ: Այդ մասին հայտարարել է ԱՄՆ Պետքարտուղարի հասարակայնության հետ կապերի գծով օգնական Մայք Համմերը` պատասխանելով Սիրիայում ընդդիմության և ներկայիս իշխանությունների հետ երկխոսությանը վերաբերող հարցին:
«Համատեղ և անդադար ճնշում գործադրելու» պարտավորությունն իրենց վրա են վերցրել ՄԱԿ-ի հատուկ միավորումները և Արաբական պետությունների լիգան (ԱՊԼ)` Քոֆի Անանի գլխավորությամբ, ինչպես նաև հունիսի 30-ին Ժնևում կայացած միջազգային խորհրդակցության անդամները:
ԱՄՆ արտաքին հարաբերությունների ներկայացուցիչը հայտարարել է, որ իր երկիրն անում է ամեն ինչ, որպեսզի Սիրիայում վերջ դրվի բռնությանը և սկսվի իշխանության փոխանցման գործընթացը նոր քաղաքական ուժերին: Սակայն ընդդիմության հետ երկխոսությունից ոչ մի մեջբերում չանելով` նշել է միայն, որ Օբամայի կարծիքով` Ասադը պետք է զիջի` հասկանալով, որ նա կորցնում է հսկողությունը Սիրիայի նկատմամբ և բռնությամբ ոչնչի հասնել չի կարող:
Համարելով Սիրիան առանց Ասադի արդեն անխուսափելի երևույթ` Վաշինգտոնը սկսել է նախապատրաստել Սիրիային դրան: Նա գտնում է, որ Ասադի հեռանալուց հետո էթնիկ և կրոնական տարբեր խմբավորումներ կարող են միավորվել և ձևավորել այնպիսի կառավարություն, որը կարտացոլի ողջ բնակչության հետաքրքրությունները:
Համմերը նշել է, որ «ԱՄՆ-ը փորձում է ստեղծել այնպիսի պայմաններ, որոնք Ասադի իշխանությունը արագորեն կտապալեն և կապահովեն քաղաքական իշխանության փոխանցումը: Դրան հասնելու համար Վաշինգտոնը պատրաստ է խստացնել Դամասկոսի դեմ կիրառվող տնտեսական պատժամիջոցները»:
